نئی دہلی: ہندوستان آج 78 واں یوم آزادی منا رہا ہے۔ اس سال کے جشن آزادی کا تھیم، ’وِکسِت بھارت @2047' ہے۔ اس کا مقصد ملک کو سال 2047 تک ایک ترقی یافتہ ملک بننے کے اپنے ہدف کی طرف بڑھانا ہے۔
15 اگست 1947 کو بھارت نے جنگ آزادی کی طویل جد و جہد کے بعد برطانوی حکومت سے آزادی حاصل کی تھی۔ تب سے ہر سال 15 اگست کو ملک بھر میں جشن آزادی کا اہتمام دھوم دھام سے کیا جاتا ہے۔
آج دہلی کے لال قلعہ پر مرکزی تقریب کا آغاز وزیر اعظم مودی کے سینئر حکومتی اور فوجی حکام کی جانب سے استقبال کے ساتھ ہوا۔ اس کے بعد انہوں نے گارڈ آف آنر کا معائنہ کیا۔ بعد ازاں وزیراعظم نے قومی پرچم لہرایا، جس کے ساتھ 21 توپوں کی سلامی دی گئی۔
لال قلعہ پر اس عظیم الشان تقریب کے پیش نظر دہلی میں سڑکوں سے لے کر فضا تک سیکورٹی کے سخت انتظامات کیے گئے۔ ہر موڑ پر سیکورٹی سخت کر دی گئی ہے۔ لال قلعہ اور پوری دہلی کی حفاظت کے لیے این ایس جی، ایس پی جی، نیم فوجی دستوں اور دہلی پولیس کے 35 ہزار سے زائد اہلکاروں نے دارالحکومت کی سیکورٹی کی کمان سنھالی۔
