حیدرآباد: سیاست اور میڈیا کی برادری کے لوگوں کے لیے گذشتہ کئی روز کافی مصروف گزرے۔ لوک سبھا انتخابات ابھی اختتام پذیر ہوئے تھے کہ مسلسل تیسری مدت کے لیے حکومت سازی کی تیاریاں شروع ہوگئیں۔ ایسے میں مجھے راموجی راؤ کے انتقال کی المناک خبر ملی۔ ہم ایک دوسرے کے کافی قریبی تھے، اس نوعیت سے یہ انتہائی ذاتی نقصان محسوس ہوا۔
جب میں راموجی راؤ کے بارے میں سوچتا ہوں تو مجھے ایک کثیر جہتی روشن خیال شخصیت یاد آتی ہے جس کی چمک کا کوئی ثانی نہیں تھا۔ ان کا تعلق ایک کسان گھرانے سے تھا لیکن انہوں نے سنیما، انٹرٹینمنٹ، میڈیا، زراعت، تعلیم اور حکمرانی کی متنوع دنیا میں اپنی منفرد شناخت بنائی۔ ان کی زندگی میں جو چیز عام رہی، وہ تھی ان کی عاجزی اور نچلی سطح سے جڑے رہنا۔ ان اچھی خصلتوں کی بدولت انہیں لوگوں سے کافی پیار ملا۔
راموجی راؤ نے میڈیا کے میدان میں انقلاب برپا کیا۔ انہوں نے سالمیت، جدت اور عمدگی کے نئے معیار قائم کیے۔ وہ زمانے کے ساتھ آگے بڑھے اور وہ زمانے سے آگے نکل گیے۔ ایک ایسے وقت میں جب اخبارات خبروں کا سب سے زیادہ مقبول ذریعہ تھے، انہوں نے ایناڈو شروع کیا۔ 1990 کی دہائی میں جب ہندوستان نے ٹی وی کی دنیا کو اپنایا، تو وہ ای ٹی وی کے ساتھ نمایاں طور پر سامنے آئے۔ غیر تیلگو زبانوں میں بھی چینلز کا آغاز کرتے ہوئے، انہوں نے ’ایک بھارت شریشٹھ بھارت‘ کے جذبے کو فروغ دینے کے لیے قابل ذکر عزم ظاہر کیا۔
راموجی راؤ اپنی پیشہ ورانہ کامیابیوں سے ہٹ کر بھارت کی ترقی کے لیے پرجوش تھے۔ ان کی کوششیں نیوز روم سے بھی آگے بڑھ کر تھیں، جن سے تعلیمی، کاروباری اور سماجی شعبوں پر مثبت اثرات مرتب کیے۔ وہ جمہوری اصولوں پر پختہ یقین رکھتے تھے۔ یہ لڑائی کا جذبہ اس وقت سب سے زیادہ دیکھا گیا جب کانگریس پارٹی نے این ٹی آر کو ہراساں کیا اور 1980 کی دہائی میں غیر رسمی طور پر ان کی حکومت کو برطرف کیا۔ اس وقت کانگریس مرکز اور آندھرا پردیش میں برسراقتدار تھی، لیکن وہ ڈرنے والے نہیں تھے، انہوں نے ان غیر جمہوری کوششوں کا نہایت ہی بے باکی سے مقابلہ کیا۔
میں خوش قسمت ہوں کہ ان کے ساتھ بات چیت کرنے اور ان کی حکمت سے استفادہ کرنے کے کئی مواقع ملے۔ میں نے متنوع مسائل پر ان کے خیالات کی دل سے قدر کی۔ چیف منسٹر کے طور پر اپنے دنوں سے میں نے ان سے قیمتی بصیرت اور رائے حاصل کی۔ وہ ہمیشہ گڈ گورننس کی کوششوں کے بارے میں جاننے کے خواہش مند رہتے تھے۔ خاص طور پر گجرات میں زراعت اور تعلیم کو لے کر۔
سال 2010 میں کسی وقت انہوں نے مجھے راموجی فلم سٹی میں مدعو کیا۔ اس بات چیت کے دوران وہ بچوں کی یونیورسٹی کے قیام کے لیے گجرات کی کوششوں کے بارے میں مزید جاننے کے لیے متجسس تھے، کیونکہ انھوں نے محسوس کیا کہ اس طرح کا تصور پہلے کبھی نہیں سنا گیا تھا۔ ان کی حوصلہ افزائی اور حمایت ہمیشہ غیر متزلزل رہی۔ 2012 میں جب مجھے چوتھی بار وزیر اعلیٰ بننے کا موقع ملا تو انہوں نے خوشی کا اظہار کرتے ہوئے مجھے ایک انتہائی دل کو چھو لینے والا خط بھیجا۔
جب ہم نے سوچھ بھارت مشن شروع کیا تو وہ اس کوشش کے سب سے مضبوط حامیوں میں سے ایک تھے۔ انہوں نے ذاتی طور پر اور اپنے میڈیا نیٹ ورک کے ذریعے اس کی حمایت کی۔ یہ راموجی راؤ ہی تھے جنہوں نے اس بات کو یقینی بنایا کہ ہم مہاتما گاندھی کے خواب کو ریکارڈ وقت میں پورا کرنے کے قابل ہیں اور کروڑوں ہندوستانیوں کے وقار کو بھی یقینی بنائیں گے۔
میں اسے بڑے فخر کی بات سمجھتا ہوں کہ ہماری سابقہ حکومت نے انہیں پدم وبھوشن سے نوازنے کا اعزاز حاصل کیا۔ ان کی ہمت، لچک اور لگن نسلوں کو متاثر کرتی رہے گی۔ ان کی زندگی سے نوجوان نسل یہ سبق لے سکتی ہے کہ کس طرح رکاوٹوں کو مواقع میں، چیلنجز کو کامیابیوں میں اور ناکامیوں کو کامیابی میں تبدیل کرنا ہے۔
پچھلے کچھ دنوں سے راموجی راؤ بیمار تھے اور میں الیکشن سے متعلق مصروفیات کے درمیان بھی ان کی صحت کے بارے میں دریافت کرتا رہتا تھا۔ مجھے یقین ہے کہ وہ ہمارے دوست چندرا بابو نائیڈو کی قیادت میں ہماری حکومت کے ساتھ میدان میں اترتے دیکھ کر بہت خوش ہوئے ہوں گے، چاہے وہ مرکز میں ہو یا آندھرا پردیش میں۔ ہم اپنی قوم اور معاشرے کے لیے ان کے وژن کو پورا کرنے کے لیے کام کرتے رہیں گے۔ جیسا کہ ہم راموجی راؤ کے انتقال پر سوگ منا رہے ہیں، میری دلی تعزیت ان کے خاندان، دوستوں اور لاتعداد مداحوں کے ساتھ ہے۔ راموجی راؤ ہمیشہ تحریک کی روشنی بنے رہیں گے۔
(نوٹ: یہ مضمون ایناڈو میں شائع ہونے والی اصل تحریر کا ترجمہ ہے)
