پریاگ راج: الہ آباد ہائی کورٹ میں ایک عرضی دائر کی گئی ہے جس میں دعویٰ کیا گیا ہے کہ آگرہ کی جامع مسجد کی سیڑھیوں پر کرشن کی مورتی کے نشان ہیں۔ عرضی میں اے ایس آئی (آرکیالوجیکل سروے آف انڈیا) کے ذریعہ جامع مسجد کا سروے کرانے اور ایڈوکیٹ کمشنر کے ذریعہ جانچ کرانے کا مطالبہ کیا گیا ہے۔
آگرہ کے وکیل مہیندر کمار سنگھ کی درخواست پر جمعرات کو جسٹس مینک کمار جین کی بنچ میں سماعت ہوئی۔ سماعت کے دوران عیدگاہ کمیٹی نے بھی اس کیس میں فریق بننے کے لیے عدالت میں درخواست دے دی ہے۔ درخواست گزار مہیندر پرتاپ سنگھ نے ویڈیو کانفرنسنگ کے ذریعے عدالت میں اپنا کیس پیش کیا۔ عدالت نے آئندہ سماعت کے لیے 5 اگست کی تاریخ مقرر کی ہے۔
ابتدائی طور پر یہ درخواست ہائی کورٹ کی جانب سے سماعت کے لیے کلب کی ان 18 درخواستوں میں شامل تھی، جن کی عدالت نے ایک ساتھ سماعت کی ہے۔ لیکن چونکہ اس عرضی (مقدمہ نمبر تین) کا معاملہ دیگر درخواستوں سے مختلف تھا، اس لیے ہائی کورٹ نے اسے سماعت سے الگ کر دیا تھا۔
درخواست میں کہا گیا ہے کہ 1670 میں اورنگ زیب نے یہاں ایک مندر کو گرایا تھا۔ مندر کے مرکزی حصے میں واقع کرشن کی مورتی کو آگرہ کی جامع مسجد کی سیڑھیوں پر چنوا دیا تھا۔ اورنگ زیب نے ہندو عقیدے کو ٹھیس پہنچانے کی نیت سے ایسا کیا۔ درخواست میں مطالبہ کیا گیا ہے کہ اس کی تحقیقات کے لیے ایڈوکیٹ کمشنر کا تقرر کیا جائے اور اے ایس آئی سروے کرایا جائے۔ مورتی کو جامع مسجد سے ہٹا کر کرشن کی جائے پیدائش متھرا میں دوبارہ نصب کیا جائے۔ اس معاملے میں اے ایس آئی کے وکیل نے جواب داخل کرنے کے لیے وقت مانگا ہے۔
