پٹنہ: بھوجپوری اسٹار پون سنگھ نے آسنسول سے بی جے پی کے ٹکٹ پر لوک سبھا الیکشن لڑنے سے انکار کردیا ہے۔ اس وقت ترنمول کانگریس کے لیڈر شتروگھن سنہا آسنسول سیٹ سے رکن پارلیمنٹ ہیں۔ اس بارے میں پون سنگھ نے سوشل میڈیا پر ٹکٹ دینے پر بی جے پی قیادت کا شکریہ ادا کیا اور کہا کہ میں بھارتیہ جنتا پارٹی کی اعلیٰ قیادت کا تہہ دل سے شکریہ ادا کرتا ہوں، پارٹی نے مجھ پر اعتماد کیا اور مجھے آسنسول کا امیدوار نامزد کیا، لیکن کسی وجہ سے میں آسنسول سے الیکشن نہیں لڑ سکوں گا۔
ذرائع کے مطابق یہ بھی خبر گردش کر رہی ہے کہ پون سنگھ بہار کی آرا لوک سبھا سیٹ سے الیکشن لڑنا چاہتے تھے اور اس بارے میں انھوں نے کئی دفعہ عوامی طور پر اپنی خواہش کا اظہار بھی کر چکے ہیں۔ انہوں نے کہا کہ ہر کسی کی خواہش ہوتی ہے کہ وہ اپنے علاقے سے الیکشن لڑیں۔ تاہم انہوں نے یہ بھی کہا تھا کہ یہ لوک سبھا الیکشن ہے، کوئی شخص بھارت میں کہیں سے بھی الیکشن لڑ سکتا ہے۔
واضح رہے کہ مرکزی وزیر توانائی آر کے سنگھ فی الحال آرا سیٹ سے رکن پارلیمنٹ ہیں اور اس بار بھی انہوں نے اپنا دعویٰ پیش کیا ہے۔ جس کی وجہ سے بی جے پی نے پون سنگھ کو آسنسول منتقل کرنے کا منصوبہ بنایا تھا اور ٹکٹ کا اعلان بھی کر دیا تھا، لیکن اب پون سنگھ کے انکار کے بعد بی جے پی کے لیے ایک نئی مشکل کھڑی ہو سکتی ہے۔
بی جے پی نے لوک سبھا انتخابات کے لیے 2 مارچ کو اپنے 195 امیدواروں کی فہرست جاری کی تھی، جس میں پون سنگھ کو مغربی بنگال کے آسنسول سے امیدوار بنایا گیا تھا۔اس وقت ترنمول کانگریس کے لیڈر شتروگھن سنہا آسنسول سیٹ سے رکن پارلیمنٹ ہیں۔
پون سنگھ کے نام واپس لینے کے فورا بعد ٹی ایم سی نے یہ کہہ کر بی جے پی کا مذاق اڑایا کہ اس نے انتخابی مہم شروع ہونے سے پہلے ہی سیٹ کو سونپ دیا ہے۔ ترنمول کے قومی جنرل سکریٹری ابھیشیک بنرجی نے کہا کہ پون سنگھ کا نام واپس لینا مغربی بنگال کے لوگوں کے ناقابل تسخیر جذبے کا نتیجہ ہے۔ اس پر پارٹی رہنما ڈیرک اوبرائن نے طنزیہ انداز میں کہا کہ یہ کھیل شروع ہونے سے پہلے ہی کھیلا ہوبے ہے۔
یہ بھی پڑھیں: لوک سبھا انتخابات 2024 کےلئے بی جے پی کی پہلی فہرست جاری، مودی تیسری بار وارنسی سے کریں گے مقابلہ
