نئی دہلی: لوک سبھا انتخابات 2024 کے نتائج کے بعد نئی حکومت کی تشکیل کو لے کر دہلی میں سیاسی ہلچل بڑھ گئی ہے۔ وزیر اعظم نریندر مودی کی سرکاری رہائش گاہ پر آج این ڈی اے رہنماؤں کی میٹنگ ہو ئی ہے۔ اس میٹنگ میں بہار کے وزیر اعلی اور جے ڈی یو کے صدر نتیش کمار، ٹی ڈی پی کے صدر این چندرابابو نائیڈو، جیتن رام مانجھی سمیت تقریباً تمام این ڈی اے پارٹیوں کے لیڈران نے شرکت کی۔ مرکزی وزیر داخلہ امیت شاہ اور بی جے پی کے دیگر بڑے لیڈر بھی میٹنگ میں موجود رہے۔
میڈیا رپورٹس کے مطابق میٹنگ کے بعد این ڈی اے لیڈر آج ہی صدرِ جمہوریہ دروپدی مرمو سے ملاقات کر کے حکومت بنانے کا دعویٰ پیش کر سکتے ہیں۔ آج رات 7:45 بجے نریندر مودی بھی صدرِ جمہوریہ سے ملاوات کریں گے۔ حالانکہ این ڈی اے کی میٹنگ سے پہلے ہی مودی نے بدھ کو راشٹرپتی بھون میں صدر دروپدی مرمو سے ملاقات کی اور وزیر اعظم کے عہدہ کے ساتھ وزراء کونسل کا استعفیٰ بھی پیش کیا۔ صدر نے پی ایم مودی کا استعفیٰ قبول کر لیا ہے۔ تاہم انہیں نئی حکومت کے قیام تک عہدے پر برقرار رہنے کو کہا گیا ہے۔
