نئی دہلی: وقف ترمیمی بل 2024 پر مشترکہ پارلیمانی کمیٹی بدھ کو آل انڈیا شیعہ پرسنل لا بورڈ (AISPLB) سے ملاقات کرے گی۔ اجلاس آج سہ پہر 3 بجے پارلیمنٹ ہاؤس انیکسی میں منعقد ہوگا اور کمیٹی وقف ترمیمی بل پر بورڈ کی آراء یا تجاویز سنے گی۔
حال ہی میں دارالعلوم دیوبند کے وفد نے مجوزہ وقف ترمیمی بل 2024 کی سخت مخالفت کی ہے۔ ذرائع کے مطابق، مولانا ارشد مدنی نے بل کے مضمرات پر شدید تحفظات کا اظہار کیا ہے۔ انہوں نے متنبہ کیا، اگر ان ترامیم کو نافذ کیا گیا تو مسلمانوں کی عبادت گاہوں کی حفاظت خطرے میں پڑ جائے گی۔ واضح رہے مولانا ارشد مدنی نے 11 دسمبر کو مشترکہ پارلیمانی کمیٹی (جے پی سی) کے ساتھ میٹنگ میں تقریباً دو گھنٹے تبادلہ خیال کیا ہے۔
ذرائع کے مطابق دارالعلوم دیوبند کے وفد نے کمیٹی کے سامنے 22 نکاتی تجاویز بھی پیش کیں جس میں بل کو مسترد کرنے کی وجوہات بیان کی گئیں ہیں۔ میٹنگ میں جے پی سی کی مدت میں توسیع کے بعد اس کا پہلا اجلاس منعقد ہوا۔
ملاقات کے دوران مولانا ارشد مدنی نے مجوزہ ترامیم بالخصوص تاریخی اور مذہبی مقامات پر ان کے اثرات پر گہری تشویش کا اظہار کیا۔
انھوں نے کہا کہ، ہندوستان بہت سی قدیم مساجد اور عبادت گاہوں کا گھر ہے، اور کئی صدیوں کے بعد، اب ان کے اصل عطیہ دہندگان یا وقفوں کا پتہ لگانا تقریباً ناممکن ہے۔
حال ہی میں، لوک سبھا نے وقف ترمیمی بل پر جے پی سی کی مدت میں توسیع کی ہے۔ اس کے تحت ایک تحریک کو منظوری دی گئی اور 2025 کے بجٹ سیشن کے اختتام تک جے پی سی کو اپنی رپورٹ پیش کرنے کو لازمی قرار دیا۔
5 دسمبر کو، جے پی سی کے سربراہ، جگدمبیکا پال نے نوٹ کیا کہ کمیٹی نے اپنی مدت میں توسیع سے قبل دہلی میں 27 میٹنگیں کی تھیں۔ ان میٹنگوں میں متعدد اسٹیک ہولڈرز اور حکومت ہند کی مختلف وزارتوں کے ساتھ بات چیت شامل تھی۔
جے پی سی کے چیئرمین نے اس بات پر زور دیا کہ اسٹیک ہولڈرز اور وزارتوں کی ایک وسیع رینج کے ساتھ مشاورت کا مقصد اس معاملے پر ایک مکمل اور جامع رپورٹ تیار کرنا ہے۔
مرکزی حکومت کے مطابق، 1995 کا وقف ایکٹ وقف املاک کو ریگولیٹ کرنے کے لیے بنایا گیا تھا لیکن وہ طویل عرصے سے بدانتظامی، بدعنوانی اور تجاوزات جیسے مسائل کے لیے تنقید کا نشانہ بنتا رہا ہے۔ وقف ترمیمی بل، 2024، کا مقصد ڈیجیٹائزیشن، بہتر آڈٹ، بہتر شفافیت، اور غیر قانونی طور پر قبضہ شدہ جائیدادوں کو دوبارہ حاصل کرنے کے لیے قانونی طریقہ کار جیسے اصلاحات متعارف کر کے ان چیلنجوں سے نمٹنا ہے۔
جے پی سی حکومتی عہدیداروں، قانونی ماہرین، وقف بورڈ کے ارکان، اور مختلف ریاستوں اور مرکز کے زیر انتظام علاقوں کے کمیونٹی کے نمائندوں کے ساتھ وسیع مشاورت کر رہی ہے تاکہ قانون سازی کی جامع نظر ثانی کو یقینی بنایا جا سکے۔
یہ بھی پڑھیں:
