نئی دہلی: وزیر اعظم نریندر مودی نے پیر کو روسی صدر ولادیمیر پوتن کو روسی فیڈریشن کے صدر کے طور پر دوبارہ منتخب ہونے پر مبارکباد دی۔ پی ایم مودی نے سوشل میڈیا پر پوتن کو مبارکباد پیش کرتے ہوئے کہا کہ وہ بھارت اور روس کے درمیان اسٹریٹجک شراکت داری کے تعلقات کو مزید مضبوط کرنے کے منتظر ہیں۔
مودی کے کے علاوہ ایرانی صدر ابراہیم رئیسی نے بھی ولادیمیر پوتن کو صدارتی انتخابات میں دوبارہ کامیابی ملنے پر مبارکباد دی۔ ایرانی سفارت خانہ نے ٹیلی گرام پر لکھا، "ایرانی صدر نے تہنیتی پیغام بھیجا ہے جس میں انہوں نے ولادیمیر پوتن کو اپنی فتح اور روسی صدر کے عہدے پر دوبارہ منتخب ہونے پر دلی مبارکباد دی ہے۔"
ازبکستان کے صدر شوکت مرزیوئیف نے روسی صدر ولادیمیر پوتن کو مبارکباد دی۔ واضح رہے کہ روسی صدر ولادیمیر پوتن نے ایک بار پھر صدارتی انتخابات میں کامیابی حاصل کی ہے۔ ولادیمیر پوتن نے صدارتی انتخابات میں اپنی پانچویں کامیابی پر روس کے شہریوں کا شکریہ ادا کیا ہے۔
پوتن نے اپنے انتخابی ہیڈ کوارٹر میں کہا کہ سب سے پہلے، میں روس کے شہریوں کا شکریہ ادا کرنا چاہتا ہوں جو پولنگ اسٹیشنوں پر آئے اور ووٹ دیا۔ہم سب ایک ٹیم ہیں۔ انہوں نے یہ بھی کہا کہ روس میں طاقت کا سرچشمہ اس کے عوام ہیں۔
قابل ذکر ہے کہ پوتن کو صدارتی انتخابات میں ریکارڈ 87.97 فیصد ووٹ ملے۔ کمیونسٹ پارٹی آف رشین فیڈریشن کے امیدوار نکولائی کھریٹونوف 4.1 فیصد ووٹوں کے ساتھ دوسرے نمبر پر رہے جبکہ نیو پیپلز پارٹی کے امیدوار ولادیسلاو داوانکوف 4.8 فیصد ووٹوں کے ساتھ تیسرے نمبر پر رہے۔
لبرل ڈیموکریٹک پارٹی آف رشیا (ایل ڈی پی آر) کے امیدوار لیونیڈ سلٹسکی نے محض 3.15 فیصد ووٹ حاصل کیے۔ پوتن کو 2018 کے انتخابات کے مقابلے میں زیادہ ووٹ ملے۔ اُس وقت پوتن نے 76.69 فیصد حاصل کیا تھا۔ رپورٹس کے مطابق، دیگر امیدواروں کی کارکردگی 2018 میں روسی صدر ولادیمیر پوتن کے سابقہ حریفوں کے مقابلے میں کم تھی۔
یہ پہلا موقع تھا جب روس میں صدارتی انتخابات کے لیے ریموٹ الیکٹرانک ووٹنگ کا استعمال کیا گیا۔ 28 علاقوں میں رہائشیوں نے وفاقی پلیٹ فارم کا استعمال کیا جبکہ ماسکو میں لوگوں نے اپنے اپنے پلیٹ فارم پر ووٹ کاسٹ کیا۔ وفاقی پلیٹ فارم پر آن لائن ووٹنگ کے لیے حتمی ٹرن آؤٹ 94 فیصد رہا، یعنی 4.4 ملین افراد نے آن لائن ووٹ ڈالے۔
یہ بھی پڑھیں: پوتن پانچویں مرتبہ صدارتی انتخابات جیت گئے
