مظفر نگر: ضلع مظفر نگر کے روڑکی روڈ پر بلدیہ کے ایم آر ایف سینٹر کے قریب کچی آبادیوں اور جھونپڑیوں میں رہنے والے خانہ بدوش خاندان کا ایک معصوم بچہ نالے میں ڈوب کر ہلاک ہوگیا۔ معلومات کے مطابق نالہ بلدیہ نے خود بنایا تھا اور اسے کھلا چھوڑ دیا گیا تھا۔ بچے کی موت کے بعد اہل خانہ نے پولیس کو کوئی اطلاع نہیں دی اور اس کی تدفین کردی گئی۔
مقامی لوگوں کا کہنا ہے کہ کئی سال قبل بلدیہ کی جانب سے بستی کے درمیان میں نکاسی کے لیے نالہ تعمیر کیا گیا تھا۔ اس کے بعد اسے کھلا چھوڑ دیا گیا۔ اس کے علاوہ بلدیہ کی جانب سے کبھی نالے کی صفائی نہیں کی جاتی۔ اس وقت نالہ گندگی اور پانی سے بھرا ہوا ہے۔ معلومات کے مطابق جانی کا بیٹا منگل کو نالے میں گر کر مر گیا۔ جانی نے بتایا کہ کل رات ان کا تین سالہ بیٹا دوسرے بچوں کے ساتھ باہر کھیل رہا تھا۔ اس دوران بچہ کسی طرح نالے میں گر گیا۔ نالے کی گہرائی کے باعث بیٹا اس میں ڈوب گیا اور کسی کو خبر نہ ہوئی۔ کافی دیر تک گھر واپس نہ آنے پر تلاش شروع کی گئی تو اس کی لاش نالے سے ملی۔
سٹی پولیس اسٹیشن کے انچارج مہاویر سنگھ چوہان نے کہا کہ بچے کی موت کے بارے میں گھر والوں نے پولیس کو کوئی اطلاع نہیں دی تھی۔ معلوم ہوا ہے کہ گھر والوں نے بچے کی آخری رسومات ادا کر دی ہیں۔
