نئی دہلی: آندھرا پردیش کے وزیر اعلیٰ این چندرابابو نائیڈو کو 2015 کے ووٹ کے بدلے کیش اسکام کیس میں سپریم کورٹ سے بڑی راحت ملی ہے۔ سپریم کورٹ نے بدھ کے روز دسمبر 2016 میں نائیڈو کے خلاف شکایت کو خارج کرنے کے ہائی کورٹ کے فیصلے کو چیلنج کرنے والی درخواست پر غور کرنے سے انکار کردیا۔ اس کے علاوہ درخواست میں تلگودیشم پارٹی کے سربراہ نائیڈو کے خلاف تحقیقات اور ایف آئی آر کے اندراج کی ہدایت کی گئی تھی۔
جسٹس ایم ایم سندریش اور اروند کمار کی بنچ نے وائی ایس آر کانگریس پارٹی کے سابق ایم ایل اے الّا رام کرشن ریڈی کی ایک اور رٹ درخواست پر غور کرنے سے بھی انکار کر دیا، جس میں سپریم کورٹ سے اس کیس کی تحقیقات سی بی آئی کو سونپنے کی ہدایت دینے کی اپیل کی گئی تھی۔ دونوں درخواستیں ریڈی نے داخل کی تھیں۔ درخواستوں کو مسترد کرتے ہوئے سپریم کورٹ نے ریڈی سے کہا کہ عدلیہ کو سیاسی فائدے کے لیے پلیٹ فارم کے طور پر استعمال نہیں کیا جانا چاہیے۔
سپریم کورٹ نے سینئر ایڈوکیٹ سدھارتھ لوتھرا اور ایڈوکیٹ گنٹور پربھاکر اور پریرنا سنگھ کے دلائل سنے، جنہوں نے سماعت کے دوران عدالت میں سی ایم نائیڈو کی نمائندگی کی۔ کیس میں دلائل سننے کے بعد سپریم کورٹ نے درخواستوں پر غور کرنے سے انکار کردیا۔
وائی ایس آر سی پی لیڈر الّا رام کرشن ریڈی نے خصوصی جج کے سامنے شکایت درج کرائی تھی اور ٹی ڈی پی سربراہ چندرابابو نائیڈو کو اس کیس میں بطور ملزم شامل کرنے کی ہدایت کی درخواست کی تھی۔ اپنی شکایت میں انہوں نے دعویٰ کیا تھا کہ نامزد ایم ایل اے ایلوس اسٹیفنسن کو ایم ایل سی انتخابات میں تلگو دیشم پارٹی (ٹی ڈی پی) کے حق میں ووٹ دینے کے لیے 50 لاکھ روپے نقد کی پیشکش کی گئی تھی۔ یہ سنسنی خیز معاملہ 2015 میں 'کیش فار ووٹ' گھوٹالہ کے نام سے مشہور ہوا تھا۔
ریڈی نے عدالت سے رجوع کرتے ہوئے دعویٰ کیا تھا کہ اگرچہ گھوٹالے کی پہلی رپورٹ میں نائیڈو کا نام تقریباً دو درجن بار آیا تھا، لیکن تفتیشی ایجنسی نے انہیں ملزم کے طور پر نامزد نہیں کیا تھا۔ اگست 2016 میں، حیدرآباد میں انسداد بدعنوانی بیورو (اے سی بی) کی عدالت کے پرنسپل اسپیشل جج نے تلنگانہ اے سی بی کو اس کیس کی تحقیقات کرنے اور اپنی رپورٹ داخل کرنے کی ہدایت دی تھی۔ لیکن بعد میں تلنگانہ ہائی کورٹ نے شکایت اور اے سی بی کورٹ کے احکامات کو یہ کہتے ہوئے مسترد کردیا تھا کہ ریڈی کو نائیڈو کے خلاف تحقیقات کا مطالبہ کرنے کا کوئی حق نہیں ہے۔
یہ بھی پڑھیں:
