لوک سبھا انتخابات 2024 کے پیش نظر بی جے پی نے امیدواروں کی دوسری فہرست جاری کر دی ہے۔ اس فہرست میں کئی بڑے نام شامل ہیں۔ ان میں نتن گڈکری کو ناگپور سے، ہریانہ کے سابق سی ایم منوہر لال کھٹر کو کرنال سے ٹکٹ دیا گیا ہے۔ اس کے علاوہ ہرش ملہوترا کو مشرقی دہلی سے اور یوگیندر چندولیا کو شمال مغربی دہلی سے ٹکٹ ملا ہے۔
درحقیقت جب بی جے پی کی دوسری فہرست جاری کی گئی تو مہاراشٹر پر خصوصی توجہ دی گئی۔ حال ہی میں شیوسینا کے صدر ادھو ٹھاکرے نے مرکزی وزیر نتن گڈکری کو شیوسینا میں شامل ہونے کی کھلی پیشکش کی تھی۔ ان کی پیشکش پر نائب وزیر اعلیٰ دیویندر فڑنویس نے کہا تھا کہ جب مہاراشٹر کی سیٹوں پر بات ہوگی تو اس میں نتن گڈکری کا نام شامل کیا جائے گا۔ دراصل نتن گڈکری کا نام پہلی فہرست میں نہیں تھا۔ اب نتن گڈکری کو ناگپور سیٹ سے ٹکٹ دیا گیا ہے۔
اس سے قبل پہلی فہرست میں وزیر اعظم مودی (وارنسی)، شاہ (گاندھی نگر) اور وزیر دفاع راج ناتھ سنگھ (لکھنؤ) کے نام بھی شامل تھے۔ اس فہرست میں 34 مرکزی وزراء کے نام شامل تھے جبکہ تین وزراء کے ٹکٹ منسوخ کر دیے گئے تھے۔ پارٹی کی پہلی فہرست میں 28 خواتین اور 47 نوجوان شامل ہیں، جب کہ 27 امیدوار درج فہرست ذات، 18 درج فہرست قبائل اور 57 دیگر پسماندہ طبقے سے ہیں۔
