نئی دہلی: سپریم کورٹ کی سختی کے بعد ایس بی آئی (اسٹیٹ بینک آف انڈیا) نے بدھ 13 مارچ کو انتخابی بانڈز کا ڈیٹا الیکشن کمیشن کو سونپ دیا ہے۔ اس معاملے پر ایس بی آئی نے سپریم کورٹ میں حلف نامہ داخل کرتے ہوئے کہا کہ انتخابی بانڈ کے ڈیٹا کو ظاہر کرنے کے لیے الیکشن کمیشن کو دی گئی ہدایات کی تعمیل کر دی گئی ہے۔
ایس بی آئی نے بدھ کو سپریم کورٹ کو بتایا کہ یکم اپریل 2019 سے 15 فروری 2024 کے درمیان سیاسی جماعتوں کے ذریعہ کل 22,217 انتخابی بانڈ خریدے گئے اور 22,030 بانڈز کو کیش کیا گیا۔
سپریم کورٹ میں داخل کردہ حلف نامہ میں، ایس بی آئی نے کہا کہ عدالت کی ہدایت کے مطابق، اس نے 12 مارچ کو کاروباری اوقات کے اختتام سے پہلے انتخابی بانڈز کی تفصیلات الیکشن کمیشن آف انڈیا کو فراہم کر دی ہے۔ حلف نامے میں کہا گیا ہے کہ ہر انتخابی بانڈ کی خریداری کی تاریخ، خریدار کا نام اور خریدے گئے بانڈ کی مالیت سمیت مکمل تفصیلات پیش کی گئی ہیں۔
ایس بی آئی کے چیئرمین دنیش کمار کھارا کی طرف سے داخل کردہ حلف نامہ میں کہا گیا ہے کہ بینک نے الیکشن کمیشن کو انتخابی بانڈز کی نقدی کی تاریخ، چندہ وصول کرنے والی سیاسی جماعتوں کے نام اور بانڈز کی قیمت جیسی تفصیلات بھی دی ہیں۔
واضح رہے کہ چیف جسٹس ڈی وائی چندرچوڑ کی سربراہی والی پانچ ججوں کی آئینی بنچ نے 11 مارچ کو ایس بی آئی کی اس درخواست کو مسترد کر دیا تھا جس میں مذکورہ معلومات فراہم کرنے کے لیے وقت بڑھانے کی درخواست کی گئی تھی۔ لیکن عدالت نے انہیں حکم دیا کہ وہ انتخابی بانڈز کی تفصیلات 12 مارچ کو کام کے اوقات ختم ہونے سے پہلے کمیشن کو دے دیں۔
ایس بی آئی نے کہا کہ یہ ڈیٹا یکم اپریل 2019 سے 15 فروری 2024 کے درمیان خریدے اور کیش کرائے گئے بانڈز کے حوالے سے پیش کیا گیا ہے۔
یکم اپریل 2019 سے 15 فروری 2024 کے دوران خریدے گئے بانڈز کی تعداد 22,217 تھی۔ یکم اپریل 2019 سے 11 اپریل 2019 کے درمیان خریدے گئے بانڈز کی کل تعداد 3346 تھی اور ریڈیم شدہ بانڈز کی کل تعداد 1609 تھی۔ 12 اپریل 2019 سے 15 فروری 2024 کے درمیان خریدے گئے بانڈز کی تعداد 18871 تھی اور کیش کرائے گئے بانڈز کی تعداد 20,421 تھی۔ یکم اپریل 2019 سے 15 فروری 2024 کے درمیان کل 22,217 بانڈز خریدے گئے اور کل 22,030 بانڈز کو کیش کیا گیا۔
ایس بی آئی نے مطلع کیا کہ سیاسی جماعت کی جانب سے اس مدت کے دوران پندرہ دنوں کی میعاد کے اندر جن انتخابی بانڈز کو کیش نہیں کیا گیا تھا، وہ گزٹ نوٹیفکیشن نمبر 20 مورخہ 2 جنوری 2018 کے مطابق وزیر اعظم کے قومی ریلیف فنڈ میں منتقل کر دیا گیا ہے۔
یہ حلف نامہ ایس بی آئی کے چیئرمین نے 11 مارچ کو سپریم کورٹ کے جاری کردہ حکم کے مطابق داخل کیا تھا۔پیر کے روز، سپریم کورٹ نے اسٹیٹ بینک آف انڈیا کو ہدایت دی کہ وہ 12 مارچ کو کاروباری اوقات کے اختتام تک سیاسی جماعتوں کے ذریعے کیش کیے گئے انتخابی بانڈز کی تفصیلات الیکشن کمیشن آف انڈیا کو ظاہر کرے۔
سپریم کورٹ نے ایس بی آئی کو خبردار کیا تھا کہ اگر وہ اپنی ہدایات اور ڈیڈ لائن پر عمل کرنے میں ناکام رہی تو اس پر جان بوجھ کر توہین عدالت کا الزام عائد کیا جائے گا۔ منگل کو، ایس بی آئی نے عدالت عظمیٰ کے فیصلے کی تعمیل کی اور انتخابی بانڈز کی تفصیلات ای سی آئی کو بھیج دیں۔
15 فروری کو، اسی پانچ ججوں کی آئینی بنچ نے انتخابی بانڈ اسکیم کو ختم کر دیا تھا، جس بانڈز نے گمنام سیاسی فنڈنگ کی اجازت دی تھی اور اسے 'غیر آئینی' قرار دیتے ہوئے الیکشن کمیشن کو حکم دیا کہ وہ 13 مارچ تک عطیہ دہندگان کی تفصیلات، ان کی طرف سے عطیہ کی گئی رقم اور وصول کنندگان کی تفصیلات ظاہر کرے۔
یہ بھی پڑھیں:
ایس بی آئی نے انتخابی بانڈ کا ڈیٹا الیکشن کمیشن کو سونپ دیا
الیکٹورل بانڈ کیس: سپریم کورٹ نے ایس بی آئی کی درخواست کو مسترد کر دیا
