పడుకునే ముందు పాలు తాగడం వల్ల ఒత్తిడి, ఆందోళన వంటివన్నీ తగ్గి హాయిగా నిద్రపడుతుందని అమెరికాలోని సెంటర్ ఫర్ డిసీజ్ కంట్రోల్ బోర్డుకు చెందిన పరిశోధకులు చేసిన ఓ అధ్యయనంలో తేలిందట. పాలల్లో ఉండే ట్రిప్టొఫాన్‌ అనే ప్రొటీన్‌, మనసుకి సాంత్వన చేకూర్చే సెరటోనిన్‌ విడుదలకి తోడ్పడుతుంది. ఈ సెరటోనిన్‌ జీవగడియారాన్ని నియంత్రిస్తూ నిద్రకి కారణమయ్యే మెలటోనిన్‌ హార్మోన్‌ను విడదల చేస్తుంది. ఆ కారణంవల్లే పాలు తాగితే త్వరగానూ హాయిగానూ నిద్రపడుతుందట.
ఇది పరోక్షంగా బరువు తగ్గడానికీ దోహదపడుతుంది. నిద్రపట్టడం వల్ల ఆ సమయంలో ఏదైనా తినాలన్న కోరిక తగ్గిపోతుంది. పైగా నిద్ర వల్ల జీవక్రియా వేగం పెరుగుతుంది కాబట్టి గ్లూకోజ్‌ నిల్వలు పేరుకోవు. అంటే- బరువుకీ పాలకీ సంబంధం లేదు కానీ మంచి నిద్ర వల్ల బరువు పెరగకుండా ఉంటారన్నది మాత్రం నిజం అంటున్నారు పరిశోధకులు.
