ముంబయిలో అంబేడ్కర్ ఇల్లు రాజగృహపై జరిగిన దాడిని సికింద్రాబాద్ కంటోన్మెంట్ ఎమ్మార్పీఎస్ నాయకులు తీవ్రంగా ఖండించారు. అన్నా నగర్లోని అంబేడ్కర్ విగ్రహానికి పూలమాల వేసి నివాళులర్పించారు. వారం రోజుల పాటు ఎమ్మార్పీఎస్తో పాటు దళిత సంఘాలు నిరసన కార్యక్రమాలు చేపట్టాలని కోరారు. అంబేడ్కర్ ఇంటిపై జరిగిన దాడిపై దేశ ద్రోహం కింద కేసు నమోదు చేసి బాధ్యులపై కఠిన చర్యలు తీసుకోవాలని వారు డిమాండ్ చేశారు. సీబీఐ చేత విచారణ జరిపి ఈ కుట్ర వెనుక ఉన్న సూత్రధారులను బయటకు తీసుకురావాలని కోరారు. కేంద్ర బలగాల చేత అంబేడ్కర్ ఇంటికి, కుటుంబానికి భద్రత కల్పించాలని వారు విన్నవించారు.
రాజ్యాంగంలోని ఒక్కో ఆర్టికల్ను నిర్వీర్యం చేస్తూ రాజ్యాంగాన్ని ధ్వంసం చేసే కుట్ర జరుగుతోందని ఆరోపించారు. ఈ క్రమంలో అంబేడ్కర్ ఇంటిపై కూడా దాడికి పాల్పడడం హేయమైన చర్య అని అన్నారు. అంబేడ్కర్ ఇంటి పై జరిగిన దాడి రాజ్యాంగం పై జరిగిన దాడిగా ప్రతి ఒక్కరూ భావించాలని, బడుగు బలహీన వర్గాల నేతగా పేరొందిన బీఆర్ అంబేడ్కర్ ఇంటిపై దాడి అందరినీ కలచివేసిందన్నారు. ఇలాంటి ఘటనలు పునరావృతం కాకుండా ప్రభుత్వాలు కఠిన చర్యలు తీసుకోవాలని డిమాండ్ చేశారు.
ఇవీ చూడండి: వారిపై రాజద్రోహం కేసు పెట్టాలి: మందకృష్ణ
