Ind vs Pak womens world cup 2022: ఐసీసీ మహిళల వన్డే ప్రపంచకప్ మార్చి 4న న్యూజిలాండ్లో మొదలైంది. మొదటి మ్యాచ్లో ఆతిథ్య జట్టు న్యూజిలాండ్, వెస్టిండీస్ తలపడగా.. కివీస్ మూడు పరుగుల తేడాతో ఓడిపోయింది. ఇక అందరి చూపు ఆదివారం జరగనున్న మ్యాచ్పై పడింది. చిరకాల ప్రత్యర్థులైన భారత్ పాకిస్థాన్ జట్లు తలపడటమే ఇందుకు కారణం.
ప్రపంచకప్లో ఇప్పటివరకు రెండు సార్లు భారత్-పాక్ తలపడగా.. రెండింటిలోనూ టీమ్ఇండియానే విజయం సాధించింది. కాగా, ఇరు జట్లు పది వన్డేల్లో పోటీపడగా అన్నింటా మన అమ్మాయిలే గెలిచారు. గత ప్రపంచకప్ టోర్నీలో రన్నరప్గా నిలిచిన భారత్ మహిళా జట్టు ఈ సారైనా కప్ను అందుకోవాలని ఆశిస్తోంది. ఈ నేపథ్యంలో ఇరు జట్లు మధ్య జరిగిన కొన్ని మ్యాచ్ల రికార్డులను తెలుసుకుందాం..
చివరి ఐదు మ్యాచ్ల వివరాలివీ..
జులై 2, 2017
ఈ మ్యాచ్లో 95 పరుగుల తేడాతో భారత్ గెలుపొందింది. మొదట టాస్ గెలిచిన మన జట్టు 50 ఓవర్లలో 169 పరుగులు మాత్రమే సాధించింది. అనంతరం లక్ష్య ఛేదనకు దిగిన పాకిస్థాన్ను 74 పరుగులకే ఆలౌట్ చేసింది టీమ్ఇండియా. ఏక్తా బిషిత్(5/18) అద్భుతమైన బౌలింగ్తో ఆకట్టుకుంది.
ఫిబ్రవరి 19, 2017
ఈ మ్యాచ్లో టాస్ గెలిచి బౌలింగ్ ఎంచుకున్న భారత్ జట్టు... ప్రత్యర్థిని 67 పరుగులకే కట్టడి చేసింది. బ్యాటింగ్కు దిగిన టీమ్ఇండియా తన చేతిలో ఏడు వికెట్లు ఉండగానే విజయం సాధించింది. ఏక్తా బిషిత్ పది ఓవర్లలో ఐదు వికెట్ల ప్రదర్శన చేసి అందరీ దృష్టిని ఆకర్షించింది.
ఫిబ్రవరి 7, 2013
2013 మహిళల ప్రపంచకప్లో భాగంగా జరిగిన ఈ మ్యాచ్లో టాస్ గెలిచిన పాకిస్థాన్, ముందుగా బ్యాటింగ్ ఎంచుకుంది. నిదా దార్ 68 పరుగులు తోడవ్వడం వల్ల 50 ఓవర్లలో 192/7 స్కోర్ చేసింది. అనంతరం మిథాలీ రాజ్ 141 బంతుల్లో అజేయంగా నిలిచి 103 పరుగులు చేయడం వల్ల భారత్ ఆరు వికెట్ల తేడాతో ఘన విజయం సాధించింది.
మార్చి 7, 2009
2009 మహిళల ప్రపంచ కప్‌లో టాస్ గెలిచి మొదట ఫీల్డింగ్ ఎంచుకున్న భారత్ కేవలం 57 పరుగులకే పాకిస్థాన్ జట్టును కట్టడి చేసింది. ఆ తర్వాత భారత్ కేవలం 10 ఓవర్లలోనే ఒక్క వికెట్ కోల్పోకుండా లక్ష్యాన్ని ఛేదించింది.
మే 9, 2008
2008 మహిళల ఆసియా కప్‌లో భారత్ భారీ విజయం సాధించింది. తొలుత బ్యాటింగ్ చేసిన భారత్ నిర్ణీత 50 ఓవర్లలో 283/3 పరుగులు చేసింది. జయశర్మ, మిథాలీ రాజ్ అర్ధ సెంచరీలతో రాణించారు. పాకిస్థాన్ 76 పరుగులకే ఆలౌటైంది. బౌలర్లు నీతూ డేవిడ్, స్నేహల్ ప్రధాన్ చెరో మూడు వికెట్లు పడగొట్టారు.
వన్డేల్లో భారత్ VS పాకిస్థాన్
అత్యధిక స్కోరు: 2005లో కరాచీలోని నేషనల్ స్టేడియంలో జరిగిన మహిళల ఆసియా కప్‌లో పాకిస్థాన్ పై భారత్ 289/2 పరుగులు చేసింది.
అత్యల్ప స్కోరు: ఐసీసీ మహిళా ప్రపంచ కప్ మ్యాచ్లో పాకిస్థాన్ను 57 పరుగులకే ఆలౌట్ చేసింది.
అత్యధిక వ్యక్తిగత స్కోరు: 2005లో కరాచీలో జరిగిన మహిళల ఆసియా కప్ మ్యాచ్లో భారత ఓపెనర్ జయ శర్మ పాకిస్థాన్‌పై 138 పరుగులు చేసి నాటౌట్గా నిలిచింది.
ఓ మ్యాచ్లో అత్యధిక వికెట్లు: 2017లో కొలంబోలో పాక్తో జరిగిన మ్యాచ్లో భారత మహిళా స్పిన్నర్ ఏక్తా బిషిత్ ఐదు వికెట్లు తీసింది.
ఇదీ చదవండి: అలా జరిగితే ప్రపంచకప్ టీమ్ఇండియాదే: మిథాలీ రాజ్
