సెప్టెంబరు 19 నుంచి యూఏఈ వేదికగా ఐపీఎల్ నిర్వహించడానికి సోమవారం కేంద్ర ప్రభుత్వం నుంచి అనుమతి లభించింది. దేశంలో కరోనా కేసులు క్రమంగా పెరుగుతున్న కారణంగా లీగ్ను విదేశాల్లో నిర్వహించుకోవడానికి అంగీకరించింది. ఈ విషయాన్ని తెలియజేస్తూ తాజాగా ఓ ప్రకటన చేశారు ఐపీఎల్ ఛైర్మన్ బ్రిజేశ్ పటేల్.
"అవును, కేంద్ర ప్రభుత్వం నుంచి మాకు లిఖిత పూర్వక అనుమతి లభించింది. మరోసారి ప్రభుత్వం నుంచి మాట ద్వారా అనుమతి వస్తే ఎమిరైట్స్ క్రికెట్ బోర్డును సంప్రదిస్తాం. ప్రస్తుతం మా దగ్గర లిఖిత పూర్వక అనుమతులున్నాయి. అందువల్ల టోర్నీ ప్రణాళిక ప్రకారమే జరుగుతుందనే విషయాన్ని ఫ్రాంచైజీలకు స్పష్టం చేయవచ్చు."
- బ్రిజేశ్ పటేల్, ఐపీఎల్ ఛైర్మన్
ఐపీఎల్ కోసం యూఏఈకి ఆగస్టు 20న బయలుదేరడానికి ఫ్రాంచైజీలు ఇప్పటికే ప్రణాళికలు సిద్ధం చేశాయి. ప్రయాణానికి 24 గంటల ముందు ప్రతి ఒక్కరికి కరోనా పరీక్షలు చేయాలని వారు నిర్ణయించినట్లు తెలుస్తోంది.
చెన్నై సూపర్కింగ్స్ యాజమాన్యం త్వరలోనే ఆటగాళ్లకు శిక్షణా శిబిరాన్ని ప్రారంభించి.. ఈనెల 22న యూఏఈకి పయనమవ్వాలని ప్రణాళికలు చేసుకుంది. ఈ టోర్నీని షార్జా, అబుదాబి, దుబాయ్ నగరాల్లో సెప్టెంబరు 19 నుంచి నవంబరు 10 వరకు నిర్వహించనున్నారు.
