వాట్సాప్లో ఎవరైనా నచ్చకపోతే వెంటనే వారిని బ్లాక్ చేసేస్తాం. స్పామ్ అకౌంట్లు, అవసరం లేని బిజినెస్ అకౌంట్లపైనా ఇలాగే బ్లాకింగ్ అనే అస్త్రాన్ని ప్రయోగిస్తాం. ఇలా చేస్తే మన లాస్ట్ సీన్, ఆన్లైన్ స్టేటస్, స్టేటస్ అప్డేట్స్, ప్రొఫైల్ ఫొటో వంటివేవీ బ్లాక్ లిస్ట్లో ఉన్నవారికి కనిపించవు. మనకు మెసేజ్, కాల్స్ చేయడం కూడా కుదరదు. ఇప్పుడు కొత్త రకమైన బ్లాక్ ఆప్షన్ను వాట్సాప్ మనకు అందుబాటులోకి తెస్తోంది. నోటిఫికేషన్ ద్వారా యూజర్లను బ్లాక్ చేసే సదుపాయాన్ని అందుబాటులోకి తీసుకురానుంది. అతి త్వరలోనే ఈ అప్డేట్ను తీసుకురానున్నట్లు తెలుస్తోంది.
ప్రస్తుతం ఈ అప్డేట్పై వాట్సాప్ టీమ్ పనిచేస్తోందని 'WABetaInfo' వెబ్సైట్ తెలిపింది. అయితే, ఈ ఫీచర్ కాంటాక్టుల్లో ఉన్న నెంబర్లకు పనిచేయదని వెల్లడించింది. అపరిచిత కాంటాక్టులు, స్పామ్ అకౌంట్లను నియంత్రించడానికి ఈ ఫీచర్ పనికొస్తుందని తెలిపింది. వారి చాట్స్ ఓపెన్ చేసే అవసరం లేకుండా.. నోటిఫికేషన్ ట్యాబ్ ద్వారానే బ్లాక్ చేసేయవచ్చు. ఈ అప్డేట్ వల్ల కాంటాక్టులను బ్లాక్ చేయడం సులభమవుతుందని వాట్సాప్ భావిస్తోంది. బ్లాక్ చేసేందుకు యూజర్లు ఎక్కువ సమయం వృథా చేసుకోవాల్సిన అవసరం లేదని పేర్కొంది. ఈ షార్ట్కట్ బ్లాక్ ఆప్షన్ అప్డేట్ను త్వరలోనే విడుదల చేసేందుకు వాట్సాప్ ప్రయత్నాలు చేస్తోంది.
