ఓపెన్ ఏఐ సంస్థకు చెందిన ప్రముఖ చాట్బాట్ 'చాట్జీపీటీ'.. యూపీఎస్సీ పరీక్షలో ఫెయిల్ అయింది. ఈ పరీక్షల్లో కేవలం 54 మార్కులే సాధించింది. ప్రపంచంలో అతి కఠినతరమైన పరీక్షలుగా భావించే కొన్నింటిని.. చాట్జీపీటీ గతంలో సులువుగా పాస్ అయింది. యూనివర్సిటీ ఆఫ్ పెన్సిల్వేనియా వార్టన్ స్కూల్ ఎంబీఏ పరీక్ష, అమెరికా మెడికల్, లా ఎగ్జామ్లలోనూ ఉత్తీర్ణత సాధించింది. కానీ భారత్లో సివిల్ సర్వెంట్ల నియమకానికి నిర్వహించే పరీక్షల్లో మాత్రం ఫెయిల్ అయింది.
తాజాగా అనలిటిక్స్ ఇండియా మ్యాగజైన్ (ఏఈఎం) అనే సంస్థ.. చాట్జీపీటీకి సివిల్స్ పరీక్ష నిర్వహించింది. ముందుగా "యూపీఎస్ ప్రిలిమినరీ పరీక్షలో మీరు ఉత్తీర్ణులు అవుతారని అనుకుంటున్నారా?" అని ఏఈఎమ్.. చాట్జీపీటీని ప్రశ్నించింది. "అది కష్టంగానే ఉంటుందని తెలుసు. నేను ఈ పరీక్ష పాస్ అవుతానో లేదో కచ్చితంగా చెప్పలేను" అని చాట్జీపీటీ బదులిచ్చింది. దీంతో పరీక్షలో భాగంగా చాట్జీపీటీకి 100 ప్రశ్నలు సంధించింది ఏఈఎం. 2022 యూపీఎస్సీ ప్రిలిమ్స్.. క్వశ్చన్ పేపర్ 1(సెట్ ఏ) నుంచి వీటిని అడిగింది. ఇందులో కొన్ని ప్రశ్నలకు మాత్రమే చాట్జీపీటీ సరైన సమాధానాలు చెప్పగలిగింది. ఈ పరీక్షల్లో జనరల్ కేటగిరీ అభ్యర్థులకు కట్ఆఫ్ మార్కులు 87.54 కాగా.. చాట్జీపీటీ ఇందులో 54 మార్కలు మాత్రమే సాధించి ఫెయిల్ అయింది.
చాట్జీపీటీకి 2021 సెప్టెంబర్ క్రితం జరిగిన విషయాలే తెలుసు. కాబట్టి అది చాలా వరకు భారత కరెంట్ ఎఫైర్స్కు సంబంధించిన ప్రశ్నలకు సమాధానం చెప్పలేకపోయింది. అయితే భూగోళశాస్త్రం, చరిత్ర, ఆర్థిక వ్యవస్థకు సంబంధించిన కొన్ని ప్రశ్నలకు కూడా చాట్జీపీటీ సమాధానం చెప్పలేదు. కొన్ని మల్టిపుల్ చాయిస్ ప్రశ్నలకు.. పైవేవీ కాదు అనే సమాధానం కూడా ఇచ్చింది. ప్రశ్నలలో ఆ ఆప్షన్ లేనప్పటికీ.. ఈ సమాధానమిచ్చింది.
యూపీఎస్ పరీక్షని ప్రపంచంలోనే చాలా కఠినమైనదిగా పరిగణిస్తారు. సంవత్సరానికి దాదాపు 11, 12 లక్షల మంది ఈ పరీక్షను రాస్తారు. కానీ 5 శాతం మంది మాత్రమే మెయిన్స్కు ఉత్తీర్ణత సాధిస్తారు. కేస్ స్టడీస్‌పై ఆధారపడిన వాటితో సహా బేసిక్ ఆపరేషన్ మేనేజ్మెంట్, ప్రాసెస్ అనాలిసిస్ క్వశ్చన్పై చాట్బాట్ జీపీటీ.. మంచి ప్రదర్శన కనబర్చిందని ప్రొఫెసర్ క్రిస్టియన్ టెర్వీష్ తెలిపారు. ఇందులో చాట్‌జిపిటి బి నుంచి బి-గ్రేడ్‌ను పొందుతుందన్నారు. అమెరికాకు చెందిన 'ఓపెన్‌ఏఐ' అనే సంస్థ.. కృత్రిమ మేధ ఆధారంగా పనిచేసే ఈ 'చాట్ జీపీటీ' సృష్టించింది. 2022 నవంబరు 30న దీన్ని విడుదల చేశారు.
