పాన్ ఇండియా స్టార్ ప్రభాస్ హీరోగా ప్రశాంత్ నీల్ దర్శకత్వంలో ఇప్పటికే సలార్ అనే సినిమా సెట్స్పై రన్ అవుతోంది. భారీ యాక్షన్‌ ఎంటర్‌టైనర్‌గా తెరకెక్కనున్న ఈ సినిమా కోసం అభిమానులంతా ఎంతగానో ఎదురు చూస్తున్న సమయంలో.. డార్లింగ్ ఫ్యాన్స్ కోసం నిర్మాత దిల్ రాజు ఓ అదిరిపోయే అప్డేట్ ఇచ్చారు. 'సలార్' తర్వాత ప్రభాస్- ప్రశాంత్ నీల్ కాంబోలో మరో సినిమా త్వరలోనే తీయనున్నట్లు ఓ ఇంటర్వ్యూలో తెలిపారు.
"త్వరలోనే ప్రభాస్ ప్రశాంత్ నీల్ కాంబోలో ఓ పౌరాణిక సినిమా రానుంది. ఇక దీనికి సంబంధించిన స్క్రిప్ట్‌ కూడా రెడీ అయ్యింది. అయితే ప్రస్తుతం వీళ్లిద్దరూ 'సలార్'తో బిజీగా ఉన్నారు. ఆ తర్వాత ప్రశాంత్ నీల్ ఎన్టీఆర్‌తో ఓ సినిమా తీయనున్నారు. ఈ ప్రాజెక్టులన్నీ పూర్తయ్యాక ప్రభాస్ సినిమా మొదలవ్వనుంది. ప్రస్తుతం ఈ సినిమా చర్చల దశలో ఉంది" అని అన్నారు. ఇక ఈ వార్త విన్న ప్రభాస్ ఫ్యాన్స్ ఫుల్ ఖుష్ అవుతున్నారు.
మరోవైపు 'సలార్' టీజర్‌కు సంబంధించిన ఓ వార్త ప్రస్తుతం నెట్టింట తెగ చక్కర్లు కొడుతోంది. ఈ టీజర్‌ జూన్‌లో విడుదలవ్వనున్నట్లు సినీ వర్గాల టాక్. ఇప్పటికే దీనికి సంబంధించిన వర్క్‌ అంతా కూడా పూర్తయిందని అంటున్నారు. ఇక ప్రభాస్ అప్కమింగ్ మూవీ 'ఆదిపురుష్' విడుదలైన వెంటనే ఈ టీజర్‌ను విడుదల చేయనున్నారని టాక్. అంతే కాకుండా టీజర్‌లోనే సినిమా కాన్సెప్ట్‌ను చూపనున్నారని సమాచారం. ఇంకా ఈ విషయం గురించి ఎటువంటి అధికారిక ప్రకటన అయితే రాలేదు.
ఇక ప్రభాస్ అప్కమింగ్ సినిమాల విషయానికి వస్తే.. బాహుబలి పార్ట్ 2 సినిమా రిలీజ్ తర్వాత.. 2022లో 'రాధే శ్యామ్' అనే సినిమాలో నటించిన ప్రభాస్.. వరుస సినిమాలతో బిజీ షెడ్యూల్ను గడుపుతున్నారు. ఇప్పటికే కేజీఎఫ్ ఫేమ్ దర్శకుడు ప్రశాంత్ నీల్ తెరకెక్కిస్తున్న 'సలార్' షూటింగ్లో ఉన్న ఈ స్టార్.. ఈ సినిమాతో పాటు నాగ్ అశ్విన్ 'ప్రాజెక్ట్ కే' చిత్రీకరణలో బిజీగా ఉంటున్నారు. అంతే కాకుండా టాలీవుడ్ దర్శకుడు మారుతి తెరకెక్కిస్తున్న ఓ సినిమాకు కూడా సైన్ చేశారు. ప్రస్తుతం ఆ సినిమా కూడా షూటింగ్ దశలో ఉంది. మరోవైపు ప్రముఖ బాలీవుడ్ దర్శకుడు ఓం రౌత్ తెరకెక్కిస్తున్న ఓ సినిమాలోనూ నటించారు. రామాయణం ఆధారంగా తెరకెక్కుతున్న 'ఆదిపురుష్' సినిమాలో రాముని పాత్రలో కనిపించారు. ఇక 'అర్జున్ రెడ్డి' సినిమా దర్శకుడు సందీప్ రెడ్డి వంగా తెరకెక్కిస్తున్న 'స్పిరిట్' అనే సినిమాకు కుడా ప్రభాస్ సైన్ చేశారు.
