NIA Custodial Investigation: అతివాద సంస్థ పాపులర్ ఫ్రంట్ ఆఫ్ ఇండియా కార్యకర్తలను ఎన్ఐఏ అధికారులు మూడోరోజు విచారిస్తున్నారు. నలుగురు కార్యకర్తలను కస్టడీలోకి తీసుకున్న అధికారులు... పీఎఫ్ఐ కార్యకలాపాలకు సంబంధించి వివరాలను రాబడుతున్నారు. మూడురోజుల కస్టడీలో భాగంగా ఇప్పటికే రెండురోజుల పాటు నిందితులను విచారించారు. ఇవాళ్టితో కస్టడీ ముగియనుంది.
నలుగురు నిందితులు రెహమాన్, వహీద్, జాఫరుల్లా, అబ్దుల్ వారిస్‌ నుంచి పీఎఫ్ఐకి సంబంధించిన పూర్తిస్థాయి కార్యకలాపాలు సేకరించేందుకు ఎన్ఐఏ అధికారులు ప్రయత్నిస్తున్నారు. విదేశాల నుంచి నిధుల సమీకరణ, దాడులకు సంబంధించి కుట్రలపై ఆరా తీస్తున్నారు. ఇప్పటికే పీఎఫ్ఐని కేంద్రం నిషేధించగా... సర్కార్‌ నిర్ణయాన్ని నిరసిస్తూ పలు చోట్ల ఆందోళనలు జరిగాయి. మరోవైపు పీఎఫ్ఐ అనుబంధ సంస్థలపైనా ఎన్ఐఏ అధికారులు నిఘా పెట్టారు.
మరోవైపు పీఎఫ్ఐ దేశద్రోహ కార్యకలాపాలకు పాల్పడుతోందంటూ పీఎఫ్ఐని నిషేధిస్తూ కేంద్ర ప్రభుత్వం నిర్ణయం తీసుకుంది. సంస్థ సభ్యులకు ముష్కర ముఠాలతో సంబంధం ఉందన్న ఆరోపణల నేపథ్యంలో ఉగ్రవాద కార్యకలాపాల నిరోధక చట్టం(ఉపా) కింద ఈ మేరకు చర్యలు తీసుకుంది. తక్షణమే ఈ నిర్ణయం అమలులోకి వస్తుందని.. ఐదేళ్ల పాటు నిషేధం కొనసాగుతుందని పేర్కొంది. పీఎఫ్ఐతో పాటు దాని అనుబంధ సంస్థలను సైతం నిషేధిత జాబితాలో చేర్చింది.
అసలేంటీ పీఎఫ్ఐ.. 2006లో కేరళలో ఏర్పాటైంది పీఎఫ్ఐ. ప్రస్తుతం దిల్లీలో ప్రధాన కార్యాలయం ఉంది. అణగారిన వర్గాల సాధికారతే తమ లక్ష్యమని ఆ సంస్థ చెబుతూ ఉంటుంది. కానీ.. దేశంలోని భద్రతా సంస్థల వాదన మాత్రం భిన్నం. అతివాద ఇస్లాంను పీఎఫ్ఐ ప్రోత్సహిస్తోందన్నది ప్రభుత్వ వర్గాల ప్రధాన ఆరోపణ.
ఇవీ చదవండి:
