కొత్త ప్రైవసీ పాలసీ విషయంలో మెసేజింగ్ యాప్ వాట్సాప్ ఎట్టకేలకు దిగొచ్చింది. సమాచార భద్రతా బిల్లు అమలులోకి వచ్చే వరకు నూతన వ్యక్తిగత గోప్యత విధానాలను ఆమోదించాలని వినియోగదారులను ఒత్తిడి చేయబోమని తెలిపింది. కొత్త ప్రైవసీ పాలసీలపై దిల్లీ హైకోర్టు విచారణలో ఈ మేరకు వివరణ ఇచ్చింది వాట్సాప్.
వాట్సాప్ ప్రైవసీ పాలసీని ఆమోదించకుంటే.. సేవలను పరిమితం చేసే అంశంపైనా వాట్సాప్ వెనక్కి తగ్గింది. యూజర్లు అందరికీ ఒకే రకమైన సేవలను అందిస్తామని.. అప్డేట్స్ కూడా ఇస్తామని పేర్కొంది. ఈ విషయంపై ఇది వరకే స్పష్టతనిచ్చినప్పటికీ.. కొత్త ప్రైవసీ పాలసీ గురించి నోటిఫికేషన్ పంపిస్తామని గత నెలలో వాట్సాప్ పేర్కొంది. అయితే ఇటీవల మారిన పరిస్థితుల నేపథ్యంలో నిర్ణయం మార్చుకుంది.
ప్రైవసీ పాలసీని ఇటీవలే వాట్సాప్ అప్డేట్ చేసింది. కొత్త నిబంధనలను యాక్సెప్ట్ చేయాలంటూ యూజర్లకు తరచూ నోటిఫికేషన్లు పంపిస్తోంది. ఇలా చేయడం ద్వారా కొత్త పాలసీని ఆమోదించేలా వినియోగదారులను వాట్సాప్ ఒత్తిడి గురిచేస్తోందంటూ ఇటీవల న్యాయస్థానంలో పిటిషన్ దాఖలైంది.
ఇదీ చదవండి : ట్విట్టర్‌కు కొత్త మంత్రి వార్నింగ్‌- రూల్స్ తప్పితే..
