కశ్మీరీ పండిత్ను చంపి, మసీదులో దాక్కున్న ఇద్దరు తీవ్రవాదులను భద్రత బలగాలు మట్టుబెట్టాయి. మంగళవారం తీవ్రవాదులు జరిపిన కాల్పుల్లో.. ఓ జవాన్ సైతం ప్రాణాలు కోల్పోయారు. మసీదుకు ఎటువంటి నష్టం జరగకుండా చర్యలు తీసుకున్న అధికారులు.. చాకచక్యంగా వ్యవహరించి తీవ్రవాదులను హతమర్చారు. జమ్ము కశ్మీర్లోని పుల్వామా జిల్లాలో ఈ ఘటన జరిగింది. మంగళవారం ప్రత్యేక ఆపరేషన్ నిర్వహించిన భద్రత దళాలు.. అనంతరం ఉగ్రవాదులను కాల్చి చంపాయి.
కశ్మీరీ పండిత్ను కాల్చి చంపిన ఆ ఇద్దరు తీవ్రవాదులు..
ఆదివారం ఈ ఇద్దరు తీవ్రవాదులు.. సంజయ్ శర్మ అనే ఓ బ్యాంక్ సెక్యూరిటీ గార్డును కాల్చి చంపారు. అతడు ఓ కశ్మీరీ పండిత్ కావడం గమనార్హం. ఆదివారం అర్ధరాత్రి దాటాక 1.15 గంటలకు ఈ ఘటన జరిగింది. అనంతరం ఆ ఇద్దరు ఉగ్రవాదులు స్థానిక మసీదులోకి వెళ్లి తలదాచుకున్నారు.
తీవ్రవాదులు మసీదులో దాక్కున్నారని తెలుసుకున్న భద్రత బలగాలు.. ఆ పరిసరాలను చుట్టుముట్టాయి. మసీదుకు ఎటువంటి నష్టం జరగకుండా సంయమనం పాటించాయి. తీవ్రవాదులను మట్టుబెట్టేందుకు నిదానంగా ముందుకు కదిలాయి. అదే సమయంలో తీవ్రవాదులు.. బలగాలపై కాల్పులు జరిపారు. ఆ కాల్పుల్లో 55 రాష్ట్రీయ రైఫిల్స్లో విధులు నిర్వర్తిస్తున్న ఓ జవాన్కు బుల్లెట్ తగిలింది. అతడి తొడ భాగంలోకి తూటా దూసుకెళ్లింది. దీంతో జవాన్కు తీవ్ర రక్తస్రావం జరిగింది. అనంతరం ఆయన ప్రాణాలు కోల్పోయారు.
"ఒక తీవ్రవాదిని అకిబ్ ముస్తఫా భట్గా గుర్తించాం. అతడిని మసీదు పరిసర ప్రాంతాల్లో మట్టుబెట్టాం. మరో తీవ్రవాదిని అజాజ్ అహ్మద్ భట్గా గుర్తించాం. ఇతడు పుల్వామా దగ్గర్లో ఉన్న ట్రాల్ నివాసిగా తెలిసింది. అజాజ్.. మసీదు కీటికీలోంచి బయటకు దూకి.. ఓ ఇంట్లో తలదాచుకున్నాడు. సాంకేతిక పరిజ్ఞానంతో అతడిని కనిపెట్టిన బలగాలు.. అనంతరం అతడినీ మట్టుబెట్టాయి." అని అధికారులు తెలిపారు.
ఆదివారం తీవ్రవాదులో చేతిలో చనిపోయిన కశ్మీరీ పండిత్.. పుల్వామాలోని అచ్చన్లో నివాసం ఉండేవాడు. అతడి ఇంటికి వంద మీటర్ల దూరంలో తీవ్రవాదులు కశ్మీర్ పండిత్ను చంపేశారు. సంజయ్ శర్మ మార్కెట్కు వెళుతుండగా ఈ ఘటన జరిగింది. అనంతరం అక్కడే ఉన్న కొంతమంది సంజయ్ శర్మను.. ఆసుపత్రికి తరలించారు. కానీ అప్పటికే సంజయ్ మృతి చెందినట్లుగా వైద్యులు తెలిపారు.
