వర్చువల్​ కాదు.. భౌతికంగానే పార్లమెంట్​ సమావేశాలు!

పార్లమెంట్​ వర్షాకాల సమావేశాలకు ఏర్పాట్లు చేయాలని ఉభయ సభల ప్రధాన కార్యదర్శులు.. అధికారులను కోరినట్లు సమాచారం. కరోనా మహమ్మారి వ్యాప్తి నేపథ్యంలో పార్లమెంట్​ సభ్యులు భౌతిక దూరం పాటించేలా సిట్టింగులు ఏర్పాటు చేయాలని ఆదేశించినట్లు అధికారిక వర్గాలు తెలిపాయి.

కరోనా ఉద్ధృతి నేపథ్యంలో భౌతిక దూరం పాటించేలా పార్లమెంట్​ వర్షాకాల సమావేశాలకు ఏర్పాట్లు చేయాలని ఉభయ సభల ప్రధాన కార్యదర్శులు సంబంధిత అధికారులను ఆదేశించినట్లు తెలుస్తోంది. లోక్​సభ ఒకరోజు రాజ్యసభ మరో రోజు కాకుండా రెండు సభలనూ ఏకకాలంలో, యథాస్థానాల్లోనే నిర్వహించే అవకాశాలున్నట్లు అధికారిక వర్గాలు చెప్పాయి.

కరోనా నేపథ్యంలో పార్లమెంటు సమావేశాల ఏర్పాటుకు సంబంధించి లోక్​సభ స్పీకర్​ ఓం బిర్లా, రాజ్యసభ ఛైర్మన్​ వెంకయ్యనాయుడు శనివారం చర్చించారు.

పార్లమెంటు గ్రంథాలయ భవనంలోని బాలయోగి ఆడిటోరియం, సెంట్రల్ హాల్, ఉభయ సభల గ్యాలరీలు, లాబీలను సమావేశాల ఏర్పాటు కోసం పరిశీలిస్తున్నట్లు అధికారిక వర్గాలు పేర్కొన్నాయి.

ఈ సమావేశాలు ఎప్పుడు ప్రారంభమవుతాయనే విషయంపై స్పష్టత లేకపోయిన.. సెప్టెంబర్​ 22 లోపే జరగాలి. నిబంధనల మేరకు రెండు సమావేశాల మధ్య వ్యవధి 6 నెలలకు మించకూడదు.

అంతకుముందు.. ఏప్రిల్​ 3 వరకు జరగాల్సిన బడ్జెట్ సమావేశాలు కరోనా మహమ్మారి కారణంగా మార్చి 23న వాయిదా పడ్డాయి.

ఇదీ చూడండి:'మహా'లో కరోనా విజృంభణ.. కొత్తగా 8,139 కేసులు