కరోనాపై 'ఆన్​లైన్ పోరు'కు భారత్ ప్రతిపాదన

కరోనా వైరస్​పై పోరుకు దక్షిణాసియా దేశాల మధ్య ఓ ఆన్​లైన్​ ప్లాట్​ఫాం ఏర్పాటు చేద్దామని ప్రతిపాదించింది భారత్. సార్క్ దేశాల ఆరోగ్య శాఖ అధికారుల సమావేశంలో ఈ మేరకు సభ్య దేశాల అభిప్రాయం కోరింది. ఈ ఆన్​లైన్ ప్లాట్​ఫాం ద్వారా వైరస్​కు సంబంధించిన సమాచార మార్పిడి, నిపుణులకు శిక్షణ వంటివి ఇచ్చిపుచ్చుకునే వీలు కలుగుతుందని వివరించింది.

కరోనాపై యుద్ధం కోసం దక్షిణాసియా దేశాలు ఓ ఆన్​లైన్ ప్లాట్​ఫాం ద్వారా ఒక్కటవ్వాలని ప్రతిపాదించింది భారత్. దక్షిణాసియా దేశాల ప్రాంతీయ సహకార కూటమి(సార్క్) దేశాల ఆరోగ్య శాఖ అధికారుల వీడియో కాన్ఫరెన్స్ వేదికగా ఈ మేరకు సభ్య దేశాల అభిప్రాయం కోరింది.

"కరోనాపై పోరాటానికి సార్క్ దేశాలకు ఓ ఉమ్మడి ఆన్​లైన్ వేదిక ఉండాలని భారత్ తరఫున ప్రతిపాదిస్తున్నాం. దీనిద్వారా సమాచార మార్పిడి, నిపుణుల సూచనలు, వైరస్​పై పోరాడేందుకు మెరుగైన విధానాలపై దేశాల మధ్య అవగాహన పెరిగేందుకు వీలవుతుంది."

-విదేశాంగ శాఖ ప్రకటన

అయితే ఈ ఉమ్మడి ఆన్​లైన్ వేదిక ఏర్పాటుకు కావలసిన పనులు ఇప్పటికే మొదలయ్యాయని విదేశీ వ్యవహారాల శాఖ అధికారులు వెల్లడించారు. ఆన్​లైన్ ప్లాట్​ఫాం ద్వారా కరోనాపై తీసుకోవాల్సిన చర్యలు, వైరస్​పై పోరాటానికి ఇంటర్నెట్ ద్వారా శిక్షణ వంటివి నిర్వహించనున్నట్లు చెప్పారు. ఈ ప్లాట్​ఫాం ఏర్పాటయ్యే లోగా ఆరోగ్యశాఖ ఉన్నతాధికారులు ఈ-మెయిల్, వాట్సాప్ గ్రూప్ ద్వారా సమాచారం ఇచ్చిపుచ్చుకోనున్నట్లు అధికారులు వెల్లడించారు.

మార్చి 15న జరిగిన దేశాధినేతల వీడియో కాన్ఫరెన్స్​లో సార్క్ దేశాల ఆరోగ్య శాఖల ప్రతినిధులు వైరస్​పై చర్చించాలని ఆకాంక్షించారు ప్రధానమంత్రి నరేంద్రమోదీ. ప్రధాని ఆకాంక్ష మేరకు నేడు సభ్యదేశాలైన భారత్​, అఫ్గానిస్థాన్, భూటాన్, మాల్దీవులు, నేపాల్, పాకిస్థాన్, శ్రీలంక ఆరోగ్యశాఖల ప్రతినిధులు వీడియో కాన్ఫరెన్స్ ద్వారా సమావేశమయ్యారు. ఈ భేటీలోనే కరోనాపై పోరుకు ఉమ్మడి ఆన్​లైన్ వేదిక ఏర్పాటుకు భారత్ ప్రతిపాదన చేసింది.

ఇదీ చూడండి: కష్టకాలంలో వైద్యుల పోరాటంపై రాష్ట్రపతి ప్రశంసలు