టిక్టాక్.. ఈ కాలంలో విపరీతంగా ప్రాచుర్యం పొందిన వీడియో యాప్. దీని ద్వారా కొందరి జీవితాలు ఇబ్బందులు పడిన సందర్భాలు ఎన్నో ఉన్నాయి. వీడియోలు చేసే క్రమంలో కొందరు ప్రాణాలు కూడా పోగొట్టుకుంటున్నారు. ఇదే క్రమంలో దిల్లీ రోహిణి నగరంలో టికిటాక్ వీడియో వల్ల రెండు బృందాల మధ్య మొదలైన గొడవ.. కాల్పులకు దారితీసింది. ఈ ఘటనలో తుపాకీ కాల్పుల వల్ల నలుగురు తీవ్రంగా గాయపడ్డారు. ఘటనాస్థలానికి చేరుకున్న పోలీసులు క్షతగాత్రులను ఆస్పత్రికి తరలించారు.
అగర్ నగర్లోని సోమ్ విహార్ ప్రాంతంలో సోమవారం రాత్రి 10:02 గంటలకు ఈ ఘటన జరిగినట్లు పోలీసులు గుర్తించారు. గాయపడిన వారిలో రవిశర్మ (25), రాజేందర్ (46), హిమాన్షు పాల్ (23), సంజీవ్ కుమార్ (21)లు ఉన్నారు. వీరంతా అగర్ నగర్, బ్రిజి విహార్, షీష్ మహల్ గృహ సముదాయాలకు చెందిన వారు.
టిక్టాక్ చేయొద్దని...
ఇరు వర్గాలకు చెందిన సభ్యులు.. నవంబర్ 29న ఓ వివాహ శుభకార్యానికి హాజరయ్యారు. అక్కడ టిక్టాక్ వీడియో చేసే క్రమంలో వాగ్వాదం జరిగింది. వీడియో చిత్రీకరించొద్దని ఓ బృందానికి చెందిన వ్యక్తి మరో బృందాన్ని హెచ్చరించాడు. వారి మధ్య వాగ్వాదం జరిగింది. మరుసటి రోజు ఆ వ్యక్తి.. బాధితుల్లో ఒకరిపై దాడి చేశాడు.
కొన్ని రోజుల తర్వాత బాధితులు.. నిందితులపై పగ తీర్చుకునేందుకు వెళ్లారు. కానీ వారికి ఎవరూ కనిపించకపోవడం వల్ల అక్కడే ఉన్న ఒకరి తల్లితో వాగ్వాదానికి దిగారు. ఆమెతో ఆసభ్యంగా ప్రవర్తించారు. అనంతరం బాధితులను చంపుతానని ఆమె కొడుకు బెదిరించాడు.
కొద్ది రోజుల తర్వాత అగర్ నగర్లోని సోమ్ విహార్ ప్రాంతంలో బాధితులు ఉన్నారని తెలుసుకున్న ముగ్గురు నిందితులు ద్విచక్రవాహనాలపై అక్కడికి చేరుకున్నారు. ఒక్కసారిగా వారు ఉన్న గదిలోకి చొరబడి.. కాల్పులకు పాల్పడ్డారు. ఎనిమిది రౌండ్లు తూటాలు పేల్చారు.
ఈ మొత్తం ఘటనపై భారతీయ శిక్షా స్మృతిలోని సెక్షన్ 307, 34 కింద కేసు నమోదు చేసుకుని దర్యాప్తు చేపట్టారు పోలీసులు.
ఇదీ చూడండి: పౌరసత్వ బిల్లు ఆమోదం పొందితే షాపై అమెరికా ఆంక్షలు!
