వ్యవసాయ చట్టాలను రద్దు చేయాలని కోరుతూ రాష్ట్రపతి రామ్నాథ్ కోవింద్ను కలవనుంది రాహుల్ గాంధీ నేతృత్వంలోని కాంగ్రెస్ బృందం. డిసెంబర్ 24న కలిసి.. సాగు చట్టాలకు వ్యతిరేకంగా 2 కోట్ల మంది సంతకాలు చేసిన మెమోరాండంను ఆయనకు సమర్పించనున్నారు. రాహుల్ అధ్యక్షతన కాంగ్రెస్ ఎంపీలు, ఇతర నాయకులు రాష్ట్రపతిని కలిసి ఈ వినతిపత్రాన్ని సమర్పించడంతో పాటు, ప్రజాసంక్షేమం దృష్ట్యా ఈ అంశంలో జోక్యం చేసుకోవాలని కోరనున్నారు. ఈ మేరకు ఏఐసీసీ ప్రధాన కార్యదర్శి కేసీ వేణుగోపాల్ ఓ ప్రకటన విడుదల చేశారు. 3 వ్యవసాయ చట్టాలు రైతులకు తీవ్ర వేదన కలిగిస్తున్నాయని ఆయన పేర్కొన్నారు.
కేంద్రం తెచ్చిన చట్టాల రద్దులో రాష్ట్రపతి జోక్యం చేసుకోవాలని, సెప్టెంబర్ నుంచి కాంగ్రెస్ సంతకాల సేకరణ మొదలుపెట్టింది. కూలీలు, రైతులు, వ్యాపారుల నుంచి మొత్తం 2 కోట్లకుపైగా సంతకాలు సేకరించింది.
''లక్షలాది రైతులు అంతటి శీతల వాతావరణ పరిస్థితుల్లో.. సాగు చట్టాలకు వ్యతిరేకంగా ఆందోళనలు చేస్తున్నారు. కానీ.. మోదీ ప్రభుత్వం మాత్రం కొంతమంది పెట్టుబడిదారుల ప్రయోజనాల కోసం ఆ చట్టాలను తెచ్చింది. శాంతియుతంగా నిరసన చేస్తున్న రైతులను దిల్లీ రాకుండా అడ్డుకుంటున్నారు.''
- కేసీ వేణుగోపాల్, ఏఐసీసీ ప్రధాన కార్యదర్శి
వ్యవసాయ చట్టాలను రద్దు చేయాలని రైతులు డిమాండ్ చేస్తున్నా ప్రభుత్వం పట్టించుకోట్లేదని, ఇప్పటికే 44 మంది రైతులు ప్రాణాలు కోల్పోయారని ఆయన ఆవేదన వ్యక్తం చేశారు.
ఇదీ చూడండి: కమ్ముకొస్తున్న డ్రాగన్- భారత్ పరిస్థితి ఏంటి?
