ఆడపిల్లలు ఇంటి నుంచి బయటకు వెళితే తల్లిదండ్రులకు కంటిమీద కునుకు ఉండడంలేదు. సమాజం సిగ్గుపడేలా.. దేశంలో రోజురోజుకూ అత్యాచారాలు పెచ్చుమీరిపోతున్నాయి. తమిళనాడు కోయంబత్తూర్లో పుట్టిన రోజు జరుపుకుని తిరిగివస్తోన్న ఓ బాలికపై ఆరుగురు అతి రాక్షసంగా సామూహిక అత్యాచారానికి పాల్పడ్డారు.
ఇంటర్ మొదటి సంవత్సరం చదువుతున్న బాలిక నవంబర్ 26న తన పుట్టినరోజు జరుపుకునేందుకు ఇంటి నుంచి బయటకు వెళ్లింది. స్నేహితుడితో కలిసి పార్క్కు వెళ్లి.. రాత్రి 9 గంటల ప్రాంతంలో ఇంటికి తిరిగి వస్తుండగా ఆరుగురు వారిని అడ్డుకున్నారు. బాలికతో ఉన్న స్నేహితుడ్ని కొట్టి, ఆమెను నిర్మానుష్య ప్రదేశానికి ఈడ్చుకెళ్లారు. అతికిరాతకంగా ఆమెపై అఘాయిత్యానికి పాల్పడ్డారు.
వీడియో తీసి మరీ..
పశువులు కూడా అసహ్యించుకునే పని చేస్తూ.. ఆ నీచ కృత్యాన్ని వీడియోలో బంధించారు మృగాళ్లు. సెల్ఫోన్లలో చిత్రీకరించిన వీడియో పోలీసులకు లభించింది.
అమ్మా.. నన్ను వదల్లేదు!
ఆ క్రూర మృగాల నుంచి తప్పించుకుని ఇల్లు చేరింది బాలిక. అమ్మతో జరిగిందంతా చెప్పుకుంది. తరువాతి రోజు మహిళా పోలీస్ స్టేషన్లో ఫిర్యాదు చేశారు కుటుంబ సభ్యులు.
నలుగురు దొరికారు..
పోలీసుల దర్యాప్తులో నలుగురు నిందితులు పట్టుబడ్డారు. వీరిపై బాలలపై లైంగిక వేధింపుల నిరోధక చట్టం- పోక్సో (పీఓసీఎస్ఓ) లోని సెక్షన్ 354 కింద ఓ కేసు.. ఐపీసీ 506(ii) కింద మరో కేసు నమోదు చేశారు. మహిళా కోర్టులో హాజరు పరిచాక రిమాండుకై తమిళనాడు సెంట్రల్ జైలుకు తరలించారు. మరో ఇద్దరి జాడ కోసం పోలీసులు గాలిస్తున్నారు.