YSRCP Leader Misbehavior With Women: ప్రభుత్వ స్థలాన్ని కబ్జా చేసిన వైసీపీ నేత.. అడిగిన మహిళలతో అసభ్య ప్రవర్తన

YSRCP Leader Misbehavior With Women: శ్రీకాకుళం జిల్లాలో ఓ వైసీపీ నేత రెచ్చిపోయాడు. స్థలాన్ని అక్రమించుకుని దానిలో కంచె ఏర్పాటు చేయగా.. దానిని తొలగించాలని ప్రయత్నించిన స్థానిక మహిళలతో అసభ్యంగా ప్రవర్తించాడు. మీ అంతూ చూస్తానంటూ బెదిరించాడని మహిళలు వాపోయారు. వైసీపీ నేత ప్రభుత్వ స్థలాన్ని కబ్జా చేయగా.. ఇటీవలే ఆ స్థలంలో విద్యుత్​ మీటర్​ బిగించటంతో స్థానికులు మండిపడుతున్నారు.

జిల్లాలోని రణస్థలం మండలం జేఆర్​పురంలోని సీఐ కార్యాలయం వెనక ఉన్న ప్రభుత్వ స్థలాన్ని.. వైసీపీ నేత కబ్జా చేయటంతో వివాదం కొనసాగుతోంది. ప్రభుత్వ స్థలాన్ని కబ్జా చేయటంతో.. స్థానిక కాలనీల ప్రజలు ఇబ్బందులు ఎదుర్కొంటున్నారు. ఇంతకాలం ఆ స్థలంలో కాలనీలకు వచ్చే వాహనాలను నిలిపి ఉంచగా.. ఇప్పుడు కంచె ఏర్పాటుతో ఇబ్బందిగా మారింది. వివాదంలో ఉన్న ఆ స్థలానికి ఇటీవలే విద్యుత్​ మీటర్​ ఏర్పాటు చేశారు. విషయం తెలుసుకున్న స్థానికి మహిళలు కంచెను తొలగించారు. కంచె తొలగిస్తున్న సమయంలో అక్కడికి వచ్చిన వైసీపీ నేత మీ అంతు చూస్తానంటూ బెదిరించి.. అసభ్యంగా ప్రవర్తించాడని మహిళలు ఆరోపించారు. ఆ స్థలాన్ని ప్రభుత్వం స్వాధీనం చేసుకోవాలని.. ప్రభుత్వాధికారులు వైసీపీ నేతలకు కొమ్ముకాస్తున్నారని స్థానికులు మండిపడ్డారు.