Agri Gold Victims: "అగ్రిగోల్డ్​ బాధితులకు ఆగస్టు 15 వరకు న్యాయం చేయాలి.. లేకపోతే"

Round Table Meeting for Agri Gold Victims: అగ్రిగోల్డ్ బాధితులకు ముఖ్యమంత్రి జగన్​మోహన్​ రెడ్డి న్యాయం చేయకపోతే తాడోపేడో తేల్చుకుంటామని అగ్రిగోల్డ్ కస్టమర్స్, ఏజెంట్స్ వెల్ఫేర్ అసోసియేషన్ గౌరవ అధ్యక్షులు ముప్పాళ్ల నాగేశ్వరరావు హెచ్చరించారు. శ్రీకాకుళంలో అగ్రిగోల్డ్ కస్టమర్స్, ఏజెంట్స్ వెల్ఫేర్ అసోసియేషన్ ఆధ్వర్యంలో వివిధ రాజకీయ పార్టీలు, ప్రజా సంఘాలతో రౌండ్​ టేబుల్​ సమావేశం నిర్వహించారు. ఈ సమావేశంలో నాగేశ్వర రావు మాట్లాడుతూ.. ఆగస్టు 15వ తేదీ వరకు అగ్రిగోల్డ్ బాధితులకు ప్రభుత్వం న్యాయం చేయాలని.. లేకపోతే ఆగస్టు 30వ తేదీన చలో విజయవాడ కార్యక్రమాన్ని నిర్వహిస్తామని పిలుపునిచ్చారు. డిసెంబర్ నాటికి అగ్రిగోల్డ్ వ్యవహారం పూర్తిగా తేల్చాలని హెచ్చరించారు. ఈ అంశంపై ఎన్నిరోజులైనా జైలుకు వెళ్లటానికైనా సిద్ధమే అని స్పష్టం చేశారు.  ప్రభుత్వం ప్రకటనల కోసం పేపర్లు, ఛానళ్లకు చెల్లిస్తున్న డబ్బులను.. అగ్రిగోల్డ్​ బాధితులకు ఇస్తే సరిపోతుందని టీడీపీ నేత కూన రవికుమార్​ పేర్కొన్నారు. అగ్రిగోల్డ్​ బాధితులకు చంద్రబాబు అండగా ఉంటారని తెలిపారు. అగ్రిగోల్డ్​ బాధితులు అవమానాలు భరించలేక బలవంతంగా ప్రాణాలు తీసుకున్నారని ఆవేదన వ్యక్తం చేశారు.