TDP Zone-5 Meeting in Kadapa: కడపలో తెలుగుదేశం అధినేత చంద్రబాబు నాయుడి అధ్యక్షతన టీడీపీ జోన్-5 నేతలతో సమీక్షా సమావేశం జరిగింది. ఈ కార్యక్రమంలో మాట్లాడిన చంద్రబాబు వైసీపీపై తీవ్ర విమర్శలు చేశారు. వివేకా హత్య కేసుపై చంద్రబాబు స్పందించారు. తన తండ్రిని చంపినవారు ఎవరో తెలియాలని వివేకా కుమార్తె పోరాడుతోందని చంద్రబాబు పేర్కొన్నారు. ప్రపంచంలోని పోలీసు అధికారులకు వివేకా హత్య కేస్ స్టడీగా మారుతుందని చంద్రబాబు వెల్లడించారు. వివేకా హత్య కేసు నిందితులు సీబీఐ అధికారులనూ బెదిరించారంటూ పేర్కొన్నారు. వివేకాను గొడ్డలితో నరికి గుండెపోటుగా చిత్రీకరించేందుకు ప్రయత్నం చేశారని చంద్రబాబు ఆరోపించారు. అధికారంలోకి వచ్చిన వెంటనే రౌడీల తోకలు కట్ చేస్తాం.. జాగ్రత్త అంటూ హెచ్చరించారు. తమకు అడ్డు వచ్చిన వారందరినీ చంపేస్తారా అంటూ ప్రశ్నించారు. రాష్ట్రంలో హత్యా రాజకీయాలు పోవాలంటూ హితవు పలికారు. త్వరలోనే వివేకా హత్య కేసును ప్రజాకోర్టులో పెడతామని తెలిపారు.
టీడీపీ అధికారంలో ఉండగా.. రాష్ట్రానికి రూ.16 లక్షల కోట్ల పెట్టుబడులు తెచ్చామని చంద్రబాబు గుర్తు చేశారు. 5.5 లక్షల మందికి ఉద్యోగాలు ఇచ్చామని చంద్రబాబు వెల్లడించారు. రాష్ట్రానికి కియా మోటార్స్‌ను తెచ్చిన ఘనత తమదేనని చంద్రబాబు పేర్కొన్నారు. టీడీపీ అధికారంలో ఉంటే ఈ పాటికే కడప స్టీల్‌ప్లాంట్‌ పూర్తయ్యేదని తెలిపారు. జగన్.. ప్రజలకు నమ్మకం కాదు.. రాష్ట్రానికి పట్టిన దరిద్రమంటూ చంద్రబాబు విమర్శించారు. ఈ ప్రభుత్వం పోలీసులకు టీఏ, డీఏలు కూడా ఇవ్వడం లేదంటూ ఆరోపించారు. ఇక జీతాలు ఎప్పుడు పడతాయో ఉద్యోగులకే తెలియదంటూ ఎద్దేవా చేశారు. టీఏ, డీఏలు దేవుడెరుగు.. జీతాలు పడితే చాలనే పరిస్థితికి ఉద్యోగులు వచ్చారని చంద్రబాబు పేర్కొన్నారు.
వైసీపీ అధికారంలోకి వచ్చిన అనంతరం బడుగు, బలహీనవర్గాలపై హత్యలు, దౌర్జన్యాలు, దాడులు పెరిగాయని చంద్రబాబు విమర్శించారు. రాష్ట్రంలో నిరుద్యోగం బాగా పెరిగిందని చంద్రబాబు ఆరోపించారు. తెలుగుదేశం పార్టీ సంక్షేమ కార్యక్రమాలకు స్వర్ణయుగం ఉండేదని చంద్రబాబు వెల్లడించారు. ఎస్సీ, ఎస్టీ, బీసీలకు సబ్‌ ప్లాన్ ఉందా అని ప్రశ్నించారు. అన్న క్యాంటీన్‌, చంద్రన్న భరోసా, విదేశీ విద్య ఏమైందో చూస్తున్నామంటూ పేర్కొన్నారు. ఎక్కడైనా రైతు ఆనందంగా ఉన్నాడా అని ప్రశ్నించారు. గిట్టుబాటు ధర వస్తుందా లేదా అనేది గమనించాలని తెలిపారు. తాము అధికారంలో ఉండగా.. రాయితీపై మైక్రో, డ్రిప్‌, స్ప్రింక్లర్ పరికరాలు ఇచ్చామని గుర్తు చేశారు. రాయలసీమను హార్టికల్చర్‌ హబ్‌గా చేయాలనుకున్నామని తెలిపారు.
టీడీపీ అధికారంలో ఉండగా రాయలసీమలో ప్రాజెక్టులను పరుగులు పెట్టించామని చంద్రబాబు పేర్కొన్నారు. హంద్రీనీవా, గాలేరు-నగరి, గండికోట పనులను టీడీపీ చెపట్టినవే అని గుర్తు చేశారు. పట్టిసీమ ద్వారా రాయలసీమకు సాగునీరు ఇచ్చామన్న చంద్రబాబు పట్టిసీమ పూర్తి చేశాం కనుకే రాయలసీమకు వంద టీఎంసీలు వస్తున్నాయని పేర్కొన్నారు. 500 టీఎంసీలు తరలిస్తే చాలు.. రాయలసీమ రతనాల సీమగా మారుతుందని వెల్లడించారు. అప్పర్ భద్ర కడితే శ్రీశైలానికి నీళ్లు రావని చంద్రబాబుబ పేర్కొన్నారు. అయినా జగన్ పట్టించుకోరని.. జగన్ రాయలసీమ ద్రోహి అంటూ విమర్శించారు. తాము అధికారంలో ఉంటే పోలవరం ఎప్పుడో పూర్తయ్యేదని చంద్రబాబు వెల్లడించారు.
ఇవీ చదవండి:
