పేదరికంతో కడుపున పుట్టిన బిడ్డను తల్లిదండ్రులు అమ్మేసిన సంఘటన పశ్చిమగోదావరి జిల్లాలో ఆలస్యంగా వెలుగులోకి వచ్చింది. రాజమహేంద్రవరం సమీపంలోని ఓ గ్రామంలో బాలమ్మ, దొరబాబు అనే దంపతులు కూలి పని చేసుకుంటూ జీవిస్తున్నారు. వీరికి ఇద్దరు సంతానం ఉన్నారు. కొన్ని రోజుల క్రితం బాలమ్మ మరో బిడ్డకు జన్మనిచ్చింది. హైదరాబాద్కు చెందిన ఓ జంటకు 30 వేల రూపాయలకు బిడ్డను విక్రయించారు బాలమ్మ- దొరబాబు దంపతులు. ఈ వ్యవహారంలో ఓ ఆర్ఎంపీ మధ్యవర్తిత్వం చేశారు.
బిడ్డ పుట్టక ముందే ఒప్పందం
హైదరాబాద్కు చెందిన ఓ జంటకు పెళ్లై 14 సంవత్సరాలైన సంతానం కలగలేదు. వీరికి రాజమహేంద్రవరానికి చెందిన ఓ ఆర్ఎంపీ వైద్యుడు పరిచయమయ్యాడు. ఎవరైనా పిల్లలు ఉంటే పెంచుకుంటామని వైద్యుడికి వారు తెలిపారు. ఈ క్రమంలో బాలమ్మ, దొరబాబును వైద్యుడు కలిశాడు.
'ఇప్పటికే మీకు ఇద్దరు సంతానం ఉన్నారు. మరొక బిడ్డ పుడితే మీరు ఎలా పెంచగలరు. పిల్లలు లేని ఓ దంపతులు నన్ను సంప్రదించారు. ఎవరైనా పిల్లలు ఉంటే తమకు ఇస్తే పెంచుకుంటామని తెలిపారు. మీకు పుట్టే బిడ్డ ఆడ పిల్లయినా, మగ పిల్లవాడైన వారికి ఇస్తే మీకు 30,000 ఇస్తారు' అని వారికి వైద్యుడు నచ్చజెప్పి ఒప్పించాడు. రాజమహేంద్రవరంలోని ఓ ప్రైవేట్ ఆస్పత్రిలో బాలమ్మ ఈ నెల రెండో తేదీన మగబిడ్డకు జన్మనిచ్చింది. అనుకున్న ప్రకారం బిడ్డను తీసుకువెళ్లాలని హైదరాబాద్లోని జంటకు వైద్యుడు ఫోన్ చేశాడు. అయితే కరోనా నేపథ్యంలో ఇప్పుడు అక్కడికి రావడం కుదరదని.. భీమవరంలోని తమ కుటుంబ సభ్యులు వచ్చి డబ్బులు ఇచ్చి పిల్లాడిని తీసుకువెళ్తారని వారు తెలిపారు. ఆ విధంగా ఈ నెల ఆరో తేదీన బిడ్డ భీమవరం చేరాడు.
ఇలా దొరికారు
పసిబిడ్డ ఆ ఇంట్లోకి కొత్తగా రావటంతో చుట్టుపక్కల వారికి అనుమానం వచ్చి అంగన్వాడీ కార్యకర్త, వాలంటీర్కు విషయం తెలిపారు. వారు భీమవరం పోలీస్ స్టేషన్లో ఫిర్యాదు చేశారు. బాలుడి తల్లిదండ్రులకు ఐసీడీఎస్ అధికారులు కౌన్స్లింగ్ ఇచ్చారు. పసిబిడ్డను ఏలూరులోని శిశు గృహానికి తరలించారు.
ఇదీ చదవండి
