Vizag property Rates 'మన వాళ్ల భూములున్న చోట మార్కెట్​ విలువ పెంచేయ్'.. ప్రత్యేక సవరణ పేరుతో పావులు కదుపుతున్న సర్కార్

Land Values in AP రాష్ట్రవ్యాప్తంగా భూముల మార్కెట్ విలువలను జూన్ 1నుంచి పెంచేందుకు ప్రత్యేక సవరణ పేరుతో ప్రభుత్వం చేస్తున్న కసరత్తు వైసీపీలోని కొందరు పెద్దలకు మేలు చేయనుంది. వీరు మున్ముందు భూములు కొనే అవకాశం ఉన్నచోట పెంచకుండా.. ప్రస్తుతం స్థలాలున్న చోట విలువ పెరిగేలా వ్యవహారాలు సాగుతున్నాయని తెలుస్తోంది. ప్రస్తుతం తీసుకువచ్చిన ప్రతిపాదన అభ్యంతరాల స్వీకరణను దాటి ఆ తర్వాత ఆమోదముద్ర పడితే వారి ఆస్తుల విలువ భారీగా పెరగనుంది.

Market value of property Hike in Vizag : విశాఖలో భూముల మార్కెట్ విలువ రెట్టింపు చేసేందుకు ప్రతిపాందించిన ప్రాంతాలకు సమీపంలోనే వైసీపీ పెద్దల భాగస్వామ్యంతో జరుగుతున్న భారీ హౌసింగ్ ప్రాజెక్టులు ఉన్నాయి. ఈ ప్రాంతాల్లో కొన్నిచోట్ల చదరపు గజం 25 వేల రూపాయలుంటే.. 40 వేలకు, మరికొన్ని చోట్ల 28 వేల రూపాయల నుంచి 50 వేలకు పెంచేందుకు అధికారులు ప్రతిపాందించారు. అనుకున్నట్లే జరిగితే పెంపును ఆధారంగా చేసుకొని ప్రస్తుతం నిర్మాణ దశలోని ప్రాజెక్టులను మరింత అధిక ధరలకు విక్రయిస్తారు.

బ్యాంకుల నుంచి అధిక మొత్తంలో రుణాలు పొందే అవకాశం ఉంటుంది. జాతీయ రహదారి-16లో మధురవాడ నుంచి న్యాయ కళాశాల మీదుగా రుషికొండ వరకు ఉన్న మార్గంలో ఉన్న భూముల మార్కెట్ విలువ భారీగా పెంచేందుకు ప్రతిపాందించారు. ఈ రోడ్డులోనే వైసీపీ కీలక నేతల కుటుంబసభ్యులు, వారి సహకారంతో జరుగుతున్న ప్రాజెక్టులు ఉన్నాయి. రుషికొండ సమీపంలో 50 ఎకరాల్లో వైసీపీ కీలక నేత బంధువు ఓ ప్రాజెక్టు చేపడుతున్నారు. పై స్థాయి నుంచి ఇక్కడ విలువలు భారీగా పెంచడానికి ఒత్తిళ్లు వచ్చినట్లు సమాచారం.