హిందుస్తాన్ భూములను వేదాంతాకు అప్పగించొద్దు..!

విశాఖలోని హిందుస్థాన్ జింక్ భూములను వేదాంత కంపెనీకి అప్పగించే ప్రయత్నం చేస్తే, పెద్ద ఎత్తున ఉద్యమం చేపడతామని జింక్ నిర్వాసితులు, కార్మిక సంఘాల నాయకులు సీఐటీయూ కార్యక్రమంలో హెచ్చరించారు.

విశాఖపట్నంలోని హిందుస్థాన్ జింక్ భూములను వేదాంత కంపెనీకి ధారాదత్తం చేసేందుకు కేంద్ర ప్రభుత్వం రాష్ట్ర ప్రభుత్వంపై ఒత్తిడి చేస్తోందని జింక్ కంపెనీ నిర్వాసితులు, కార్మిక సంఘాల నేతలు ఆరోపించారు. ఆ ప్రయత్నాన్ని అడ్డుకోవాలని సీఐటీయూ నేతలు పిలుపునిచ్చారు. హిందుస్థాన్ జింక్ పరిశ్రమ ఏర్పాటు కోసం 1971లో రైతులు 365 ఎకరాల భూమిని ఇచ్చారని గుర్తు చేశారు. హిందుస్థాన్ జింక్ కంపెనీ మూసివేసి వాటి స్థానంలో కాలుష్యం లేని ప్రభుత్వ పరిశ్రమలు ఏర్పాటు చేయాలని.. ఆ ప్రాంత వాసులకు ఉపాధి కల్పించాలని కోరారు. లేనిపక్షంలో ఆ భూమిని తిరిగి రైతులకు అప్పగించాలని నగర సిఐటియు ప్రధాన కార్యదర్శి ఎం.జగ్గునాయుడు డిమాండ్ చేశారు. రాష్ట్ర ప్రభుత్వం ఎటువంటి ఒత్తిడికి తలొగ్గకుండా ప్రజల పక్షాన నిలవాలని కోరారు.

ఇదీ చూడండి:క్యూఆర్ కోడ్‌లతో కుటుంబ ఆరోగ్య కార్డులు..!