సూర్యనారాయణ స్వామిని తాకిన సూర్యకిరణాలు

అరసవల్లి సూర్యనారాయణ స్వామిని సూర్యకిరణాలు తాకాయి. బంగారు వర్ణంలో స్వామివారి అందాలు ద్విగుణీకృతమైయ్యాయి. పెద్ద సంఖ్యలో భక్తులు తరలివచ్చి స్వామిని దర్శించుకుంటున్నారు.

శ్రీకాకుళం జిల్లా అరసవల్లి సూర్యనారాయణ స్వామిని సూర్యకిరణాలు స్పృశించాయి. రవికిరణాలు.... పంచద్వారాలను దాటి గాలిగోపురం మధ్య నుంచి ఆదిత్యుని తాకే అపురూప ఘట్టం ఇవాళ ఆవిష్కృతమైంది. తెల్లవారుఝాము నుంచే వేచి ఉన్న భక్తులకు.. 6 నిమిషాల పాటు ఈ అద్భుత దృశ్యాన్ని వీక్షించే భాగ్యం కలిగింది. ఉత్తరాయణం నుంచి దక్షిణాయనానికి మారే సందర్భంలో సూర్యకిరణాలు స్వామివారిని తాకడం ఇక్కడ ఆనవాయితీ. స్వామివారి పాదాలను తాకి శిరస్సు వరకు వెళ్ళే ఈ ఘట్టం …..ఏటా మార్చి 9, 10 తేదీల్లో... అలాగే అక్టోబర్ 1, 2 తేదీల్లో భక్తులకు కనువిందు చేస్తోంది. ఇవాళ సాక్షాత్కారమైన ఈ అపురూప దృశ్యాన్ని చూసి.. భక్తులు పరవశులయ్యారు. తన్మయత్వం పొందారు.