ఏటీఎంలో డబ్బులు మాయం..సిబ్బందే దొంగలు

ఏటీఎంలో నగదు నింపే ఉద్యోగులే భారీ మొత్తంలో డబ్బును కాజేసిన ఘటన ప్రకాశం జిల్లాలో జరిగింది. వారిలో ఇద్దరిని పోలీసులు అరెస్టు చేశారు. మరో ఇద్దరి కోసం గాలిస్తున్నారు.

ఏటీఎంలో డబ్బును పెట్టే ఉద్యోగులే బ్యాంకును మోసం చేసి రూ.22లక్షలకు పైగా కాజేశారు. ఈ ఘటన ప్రకాశం జిల్లాలో జరిగింది. వారిని పోలీసులు అరెస్ట్ చేసారు.

కరూర్ వైశ్యా బ్యాంక్ ఏటీఎం సెంటర్స్​లో నలుగురు నగదు నింపే ఉద్యోగం చేస్తున్నారు. ఏటీఎం సెంటర్స్​లో నగదు పెట్టే సమయంలో కంపెనీకి సంబంధించిన మెయిన్ సర్వీస్ ప్రొవైడర్ నుంచి వచ్చిన ఓటీపీ ద్వారా ఏటీఎం మిషన్​లను ఓపెన్ చేస్తారు. నగదు నింపే సమయంలో.. బాస్కెట్​లో మిగిలిన ఉన్న నగదును తస్కరిస్తుంటారు. ఆ నగదుకు సంబంధించిన వివరాలు కంపెనీకి, సంబంధిత బ్యాంకుకు తెలియజేయకుండా మోసం చేశారు.

మద్దిపాడు పీఎస్ పరిధిలో రూ.12.83 లక్షలు, ఒంగోలు తాలూకా పరిధిలో రూ. 2.48 లక్షలు, ఒంగోలు వన్ టౌన్ పరిధిలో రూ. 53 వేలు, ఒంగోలు టూ టౌన్ పరిధిలో రూ.6.83 లక్షలను దుర్వినియోగం చేసినట్లు బ్యాంక్​ అధికారులు గుర్తించారు.

ఎస్పీ మల్లికా గార్గ్ ఆదేశాల మేరకు.. ఒంగోలు డీఎస్పీ ప్రసాద్ అధ్వర్యంలో ఒంగోలు రూరల్ సీఐ ఆర్. రాంబాబు తన సిబ్బందితో ఒక బృందంగా ఏర్పడి ఈ కేసును ఛేదించారు. మొత్తం నలుగురు ఈ దోపిడీకి పాల్పడగా వారిలో చందలూరి అనిల్, రాయపాటి సోనియాలను అరెస్ట్ చేశారు. మిగతా వారికోసం గాలిస్తున్నట్లు ఎస్పీ వెల్లడించారు.

పట్టుబడ్డ నిందితుల నుంచి రూ.9 లక్షలు రికవరీ చేసారు. మిగిలిన సొమ్మును రికవరీ చేయాల్సి ఉందని ఎస్పీ తెలిపారు.

ఇదీ చదవండి: ఇసుక అక్రమ తరలింపు.. ఎస్​ఈబీ అధికారుల దాడులు