విద్యుత్‌ కోతలతో రైతుల ఇబ్బందులు.. పంటలకు నీరందించలేక అవస్థలు

Farmers Problems: సాగుకు పగటిపూట 9 గంటల నిరంతర విద్యుత్‌ సరఫరా చేస్తామన్న ప్రభుత్వ హామీ అమలు కావటం లేదు. విద్యుత్‌ సరఫరాలో అంతరాయం వల్ల రైతులు తీవ్ర ఇబ్బందులు పడుతున్నారు. కొద్దిరోజుల్లో చేతికందే పంటకు.. నీరందించలేకపోతున్నామని ఆవేదన వ్యక్తం చేస్తున్నారు. చివరి దశలో పంటలకు సరిగా నీరు పెట్టకపోతే దిగుబడి తగ్గిపోతుందని వాపోతున్నారు.

Farmers Problems: అప్రకటిత విద్యుత్‌ కోతలతో రైతులు ఇబ్బందులు ఎదుర్కొంటున్నారు. ప్రకాశం జిల్లాలోని అద్దంకి, సంతమాగులూరు, జె.పంగులూరు, బల్లికురవ తదితర మండలాల్లో పరిస్థితి దారుణంగా తయారైంది. వేల ఎకరాల్లో సాగు చేసిన మొక్కజొన్న, పసుపు, కరివేపాకు, శెనగ, కూరగాయల పంటలకు నీరందించలేక రైతులు సతమతమవుతున్నారు. ఏపుగా పెరిగిన పంటలకు.. సమయానికి నీరు అందించలేని పరిస్థితి ఉంది.

పంటకు సరిపడా నీరు ఇవ్వలేకపోతున్నాం..
ఇదివరకు సాగుకు 9 గంటలు నిరంతర విద్యుత్‌ సరఫరా ఉండేదని రైతులు చెబుతున్నారు. వారం రోజులుగా విద్యుత్‌ కోతలు ఎక్కువయ్యాయని.. దీని వల్ల పంటకు సరిపడా నీరు ఇవ్వలేకపోతున్నామని వాపోయారు. కరెంటు ఎప్పుడు వస్తుందో.. ఎప్పుడు పోతుందో తెలియని పరిస్థితి ఉందన్నారు. రెండు, మూడు ఎకరాలకు నీరందించేందుకు కూడా ఐదారు రోజుల సమయం పడుతుందన్నారు. విద్యుత్‌ కోతలపై అధికారులను అడిగినా సరైన సమాధానం లేదని రైతులు చెబుతున్నారు. సాగుకు 9 గంటల నిరంతర విద్యుత్ సరఫరా చేయాలని రైతులు కోరుతున్నారు.

ఇదీ చదవండి: