మనదైతే ఆలోచించాలి..ప్రజాధనం కదా ఎటుపోతే మనకెందుకులే అనే రీతిలో అధికారులు ప్రవర్తిస్తున్నారు. ప్రజా అవసరాల కోసం రూ.లక్షలు వెచ్చించి కొనుగోలు చేసిన యంత్రాలు నిర్లక్ష్యానికి గురవుతున్నాయి. ప్రకాశం జిల్లా కనిగిరి నగరపంచాయతీలో రహదారులు శుభ్రం చేసేందుకు అధునాతన యంత్రాన్ని కొనుగోలు చేశారు. రెండు మూడు రోజులు నడిపించారు. మరమ్మతుకు గురైందని ఏడాదిగా మూలన పడేశారు.
నగరపంచాయతీలో పార్కు ఏర్పాటు చేసి అందులో వ్యాయామ పరికరాలు ఏర్పాటు చేసేందుకు రూ.లక్షలు వెచ్చించి కిట్లు, వస్తువులు తీసుకొచ్చారు. ఇంత వరకు వాటిని బిగించలేదు. స్థానిక తహసీల్దార్‌ కార్యాలయంలో విద్యుత్‌ పోయినపుడు ఉపయోగించేందుకు పెద్ద జనరేటర్‌ కొనుగోలు చేశారు. అదీ నిర్లక్ష్యానికి గురైంది.
కమ్యూనిటీ వైద్యశాలకు సంబంధించి రోగులను ఇతర ప్రాంతాలకు తీసుకెళ్లేందుకు ఏడేళ్ల క్రితం అప్పటి ఎమ్మెల్యే ఉగ్రనరసింహారెడ్డి ఎంపీ నిధుల ద్వారా అంబులెన్స్‌ను ఏర్పాటు చేయించారు. పాలకుల మధ్య గొడవలు రావడంతో అది అలంకారప్రాయంగా తయారైంది. ఇప్పటికైన పాలకులు, అధికారులు స్పందించి ప్రజాధనం ఇలా వృథా కాకుండా వినియోగంలోని తీసుకురావాలని స్థానికులు విన్నవిస్తున్నారు.
ఇదీ చదవండి:
