ప్రకాశం జిల్లా పర్చూరులో ఆదివారం ఒక్క రోజులోనే 20 పాజిటివ్ కేసులు నమోదయ్యాయి. మండలంలో ఇప్పటివరకు 70 మంది వరకు కరోనా సోకగా ఒక్క పర్చూరులోనే 50 మందికిపైగా ఉన్నారు. మంగళవారం నుంచి ఈ నెల 10వ తేదీ వరకు మండలంలో సంపూర్ణ లాక్ డౌన్ విధించినట్లు తహసీల్దార్ కె. హరిబాబు, ఎస్ఐ రంగనాథ్ తెలిపారు. ఈ వారం రోజులు ఔషధ దుకాణాలు మినహా అన్ని దుకాణాలు మూసేస్తున్నట్లు వెల్లడించారు. పాలు కొనుగోలు చేసేందుకు ఉదయం 6 నుండి 8 గంటల వరకు మాత్రమే అనుమతిస్తామని అధికారులు చెబుతున్నారు. పట్టణంలోని ప్రధాన రహదారులతో పాటు వీధులలో బ్లీచింగ్ చల్లారు. సోడియం హైపో క్లోరైడ్ ద్రావణాన్ని పిచికారీ చేశారు. ఈ వారం రోజుల లాక్ డౌన్లో నిబంధనలు ఉల్లంఘించిన వారిపై చర్యలు తీసుకుంటామని పోలీసులు చెబుతున్నారు.
ఇవీ చదవండి
