తూర్పు గోదావరి జిల్లాలో..
అంతర్వేది నరసింహస్వామి దేవాలయంలో రథాన్ని దగ్ధం చేసిన వారిని గుర్తించి కఠినంగా శిక్షించాలని ప్రకాశం జిల్లా ఒంగోలులో భాజపా ఆధ్వర్యంలో నిరసన చేపట్టారు. హిందూ ధార్మిక సంస్థలు, దేవాలయాలపై దాడులు నివారించాలంటూ భాజపా కార్యాలయం ఆవరణలో ఆందోళనకు దిగారు.
ప్రకాశం జిల్లాలో...
ఒంగోలులో భాజపా ఆధ్వర్యంలో పార్టీ కార్యాలయం ఆవరణలో నిరసన చేపట్టారు. భాజపా లోక్సభ నియోజకవర్గ ఇన్ఛార్జ్ శ్రీనివివాసులు, నాగేందర్ యాదవ్, జనసేన నాయకులతో కలిసి దీక్ష చేశారు.
విశాఖలో..
విశాఖ జిల్లా నర్సీపట్నంలో జన సైనికులు... పార్టీ కార్యాలయం వద్ద గంటపాటు మౌన నిరసన చేపట్టారు. ఉదయం 10 గంటల నుంచి 11 గంటల వరకు నిరసన కార్యక్రమాన్ని చేపట్టారు. అంతర్వేది ఘటన తేలిగ్గా తీసుకోకుండా పూర్తి స్థాయి విచారణ జరిపించాలని ప్రభుత్వాన్ని డిమాండ్ చేశారు. విశాఖ భాజపా కార్యాలయంలో భాజపా-జనసేన నాయకుల నిరసన చేపట్టారు. అంతర్వేది ఘటన, నాయకుల గృహ నిర్బంధాన్ని వ్యతిరేకించారు.
విజయవాడలో..
విజయవాడ పశ్చిమ నియోజకవర్గంలో జనసేన నాయకులు ఆందోళన చేపట్టారు. హిందూ మత స్వామీజీలపై అక్రమ కేసులు బనాయించి వారిని అరెస్టు చేయడం దారుణమన్నారు. హిందూ ధార్మిక క్షేత్రాలలో జరుగుతున్న దాడులపై సీబీఐ విచారణ జరిపించాలని జనసేన రాష్ట్ర అధికార ప్రతినిధి పోతిన మహేష్ డిమాండ్ చేశారు.
అంతేర్వేది ఘటనలో దోషులను వెంటనే అరెస్టు చేసి శిక్షించాలని కోరుతూ భాజపా, విశ్వ హిందు పరిషత్ సంయుక్తంగా విజయవాడలో నిరసన దీక్షలు చేపట్టాయి. వైకాపా ప్రభుత్వం అధికారంలోకి వచ్చినప్పటి నుంచి హిందు దేవాలయాలపై దాడులు పెరిగాయని, ఏ ఒక్క ఘటనలోనూ బాధ్యులపై కఠిన చర్యలు తీసుకోలేదన్నారు భాజపా నేత వామరాజు సత్యమూర్తి.
గుంటూరు జిల్లాలో..
ప్రభుత్వ అండతోనే హిందూ దేవాలయాలు, ఆస్తులపై వరుస దాడులు జరుగుతున్నాయని భాజపా నేత కన్నా లక్ష్మీనారాయణ ఆరోపించారు. అంతర్వేది రథం దగ్ధం ఘటనపై అసలైన నిందితులను ప్రభుత్వం ఇంతవరకూ పట్టుకోలేదు కానీ... అధికారులపై చర్యలు తీసుకున్నామంటూ చేతులు దులుపుకోవడం సరికాదన్నారు. మతిస్థిమితం లేదనివారు చేసిన పనంటూ తప్పించుకోవడానికి లేదని ... పథకం ప్రకారమే జరిగిన దాడి అని కన్నా అభిప్రాయపడ్డారు.
అంతర్వేది ఘటనకు రాష్ట్ర ప్రభుత్వమే బాధ్యత వహించాలని జనసేన నేత బోనబోయిన శ్రీనివాస్ యాదవ్ డిమాండ్ చేశారు. అంతర్వేది ఘటనకు నిరసనగా దీక్ష చేపట్టారు. జనసేన, భాజపా నేతలను నిర్భంధించడంలో చూపిస్తున్న శ్రద్ధ... అసలైన నిందితులను పట్టుకోవడంలో చూపించాలని ఆయన డిమాండ్ చేశారు.
తిరుపతిలో..
వరుసగా హిందు దేవాలయాలపై దాడులు జరుగుతున్న కారణంగా... దేవాలయాల పరిరక్షణ కోసం తిరుపతిలో భాజాపా, జనసేన కార్యకర్తలు నిరసన దీక్ష చేపట్టారు. రాష్ట్ర ప్రభుత్వం మొండి వైఖరిని విడిచి దేవాలయాల ఆస్తులకు రక్షణ కల్పించేలా చర్యలు చేపట్టాలన్నారు.
కడపలో..
హిందువులపై, హిందూ దేవాలయాలపై దాడులు జరుగుతున్నా.. రాష్ట్ర ప్రభుత్వం స్పందించకపోవడం దారుణమని విశ్వహిందూ పరిషత్ రాష్ట్ర నాయకుడు కాకర్ల రాముడు ధ్వజమెత్తారు. కడప జిల్లా రాజంపేట సబ్ కలెక్టర్ కార్యాలయం, తహసీల్దార్ కార్యాలయం ఎదుట వీహెచ్పీ, శ్రీరామ సేవాసమితి, బజరంగ్ దళ్, భాజపా, బీజేవైఎం, జనసేన తదితర పార్టీ నాయకులు ఆందోళన చేపట్టారు.
అనంతపురంలో...
అనంతపురం జిల్లా కళ్యాణదుర్గంలో స్థానిక భాజపా కార్యాలయంలో వద్ద ఆ పార్టీ కార్యకర్తలు నిరసన చేపట్టారు. ప్లకార్డులు చేతపట్టుకొని ప్రభుత్వానికి వ్యతిరేకంగా నినాదాలు చేశారు. భాజపా, జనసేన నాయకుల అక్రమ అరెస్టులు వెంటనే ఆపాలని డిమాండ్ చేశారు.
విజయనగరంలో...
అంతర్వేది రథం దగ్దమైన ఘటనకు నిరసనగా... విజయనగరంలో భాజపా, జనసేన పార్టీలు ధర్మ పరిరక్షణ దీక్ష చేపట్టాయి. జిల్లాలోని భాజపా కార్యాలయంలో ఈ దీక్షను చేపట్టాయి.
నెల్లూరులో...
అంతర్వేది రథం దగ్ధమైన ఘటనపై రిటైర్డ్ హైకోర్ట్ న్యాయమూర్తితో విచారణ జరిపించాలని జనసేన పార్టీ డిమాండ్ చేసింది. రథం దగ్ధం చేయడాన్ని నిరసిస్తూ, నెల్లూరులో జనసైనికులు ధర్మ పరిరక్షణ దీక్ష చేపట్టారు. రాష్ట్రంలో తరచు ఆలయాల పై జరుగుతున్న దాడులు పలు అనుమానాలకు తావిస్తోందని జనసేన నేత కిషోర్ ఆందోళన వ్యక్తం చేశారు. . రాష్ట్ర ప్రభుత్వం సరైన విచారణ జరిపించకుంటే, సమస్యను కేంద్రం దృష్టికి తీసుకువెళ్లి సీబీఐ విచారణ కోరుతామన్నారు. రథం కా‌లిపోవడానికి కారణమైన వారిని వెంటనే అరెస్టు చేసి, కఠినంగా శిక్షించాలని డిమాండ్ చేశారు.
ఇదీ చదవండి:
