'ధాన్యం కోనుగోలు కేంద్రాలను ఏర్పాటు చేయండి'

నెల్లూరు జిల్లాలో ప్రభుత్వం ధాన్యం కోనుగోలు కేంద్రాలను ఏర్పాటు చేయాలని జిల్లా కలెక్టర్​ను నెల్లూరు రూరల్​ ఎమ్మెల్యే కోటంరెడ్డి శ్రీధర్​ రెడ్డి, జిల్లా రైతు సంఘం నాయకులు కోరారు. గత రబీ సీజన్లో ప్రభుత్వం తక్కువ ధాన్యం కోనుగోలు చేయటంతో మిగిలిన ధాన్యాన్ని దళారులకు అమ్ముకుని తీవ్రంగా నష్టపోయారని పేర్కొన్నారు.

నెల్లూరు జిల్లా కలెక్టర్ శేషగిరి బాబును నెల్లూరు రూరల్ ఎమ్మెల్యే కోటంరెడ్డి శ్రీధర్​రెడ్డి, జిల్లా రైతు సంఘం నాయకులు కలిశారు. జిల్లాలో వరి 3 లక్షల ఎకరాల్లో సాగు చేస్తున్నట్లు తెలిపారు. తొమ్మిది లక్షల మెట్రిక్ టన్నుల దిగుబడి వచ్చే అవకాశం ఉందని కలెక్టర్​కు వివరించారు. గత రబీ సీజన్లో జిల్లాలో 18 లక్షల మెట్రిక్ టన్నుల ధాన్యం దిగుబడి రాగా... ప్రభుత్వం కేవలం 3 లక్షల మెట్రిక్ టన్నులు మాత్రమే కొనుగోలు చేసినట్లు చెప్పారు. మిగిలిన ధాన్యాన్ని రైతులు దళారులకు అమ్ముకొని తీవ్రంగా నష్టపోయినట్లు తెలిపారు. రెండో పంట సీజన్లో అయినా రైతులు పండించిన ధాన్యాన్ని ప్రభుత్వమే నేరుగా కొనుగోలు చేయాలని కలెక్టర్​కు వినతిపత్రం ఇచ్చారు. ప్రస్తుతం వరి కోతలు మొదలు అవుతున్నాయని, ప్రభుత్వం ధాన్యం కొనుగోలు కేంద్రాలు ఏర్పాటు చేయాలని కలెక్టర్​ను కోరారు.

ఇదీ చూడండి: నిబంధనల మేరకే సరస్వతీ పవర్ లీజు గడువు పెంపు