RRR Movie: నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి ఆధ్వర్యంలో నగర పాలక సంస్థ కార్పొరేటర్లు, వైకాపా ముఖ్య నాయకులు ఇవాళ 'ఆర్ఆర్ఆర్' చిత్రాన్ని తిలకించారు. నగరంలోని ఎం.జీ. మాల్లో ఎమ్మెల్యేతోపాటు దాదాపు 70 మంది ప్రజాప్రతినిధులు మూవీని తిలకించటంతో థియేటర్లో సందడి నెలకొంది.
తొలి రోజు కలెక్షన్లలో ఆల్ టైం రికార్డు: 'ఆర్ఆర్ఆర్'.. కలెక్షన్ల పరంగా దూసుకుపోతోంది. ఇప్పటికే ప్రీమియర్స్ పరంగా 'బాహుబలి 2' రికార్డులను బ్రేక్ చేసిన 'ఆర్ఆర్ఆర్'.. తొలి రోజు వసూళ్లలోనూ అదే హవా కొనసాగిస్తోంది. కేవలం అమెరికాలోనే ప్రీమియర్స్తోపాటు తొలి రోజు కలెక్షన్లు 5 మిలియన్ల (ఇంకా పెరిగే అవకాశం ఉంది) మార్కును దాటేశాయి. దీంతో 4.59 మిలియన్ డాలర్ల 'బాహుబలి 2' రికార్డును 'ఆర్ఆర్ఆర్' బ్రేక్ చేసేసింది. దేశవ్యాప్తంగా తొలి రోజు రూ.166 కోట్ల పైచిలుకు వసూళ్లను సాధించింది 'ఆర్ఆర్ఆర్'. ఇది కూడా బాహుబలి2 కలెక్షన్ల కంటే ఎక్కువే అని చెప్పుకోవాలి. తొలి రోజున బాహుబలి-2 రూ.152 కోట్లపైనే కలెక్షన్లను సాధించింది. అయితే ఇప్పుడు ఆ రికార్డును ఆర్ఆర్ఆర్ తిరగరాసింది.
తొలిరోజే రూ.250 కోట్లు!: ఇక తొలి రోజు ఆంధ్రప్రదేశ్, తెలంగాణలో కలిపి రూ.120 కోట్లకు పైగా కలెక్షన్లను రాబట్టినట్లు ట్రేడ్ వర్గాల సమాచారం. కర్ణాటకలో రూ.16.48 కోట్లు, తమిళనాడులో రూ.12.73కోట్లు, కేరళలో రూ.4.36 కోట్లు వసూలు చేసినట్లు తెలుస్తోంది. ఇక భారత్లోని ఇతర ప్రాంతాల్లో దాదాపుగా రూ.25కోట్లు కొల్లగొట్టింది. ఓవర్సీస్లో మరో రూ.78కోట్లు సాధించింది. దీంతో మొత్తంగా తొలి రోజే రూ.257 కోట్ల పైచిలుకు వసూళ్లను ఆర్ఆర్ఆర్ రాబట్టిందని సమాచారం. ఈ మైలురాయిని అందుకున్న తొలి భారతీయ చిత్రంగా ఆర్ఆర్ఆర్ నిలిచింది. నైజాంలోనూ 'ఆర్ఆర్ఆర్' జోరు చూపిస్తోంది. తొలిరోజే రూ. 23.35 కోట్లు వసూలు చేసి ఏ సినిమాకూ అందనంత ఎత్తులో నిలిచింది. ఇప్పటివరకు ఇదే ఆల్టైం రికార్డు.
ఇదీ చదవండి :
కుంభస్థలం బద్దలుకొట్టిన 'ఆర్ఆర్ఆర్'.. తొలి రోజు కలెక్షన్లలో ఆల్ టైం రికార్డు
