ప్రస్తుత పరిస్థితులను అదనుగా చేసుకుని నాశిరకం శానిటైజర్ తయారు చేస్తూ కొందరు లబ్ది పొందేందుకు ప్రయత్నిస్తున్నారు. నెల్లూరు నగరం సంతపేట ప్రాంతంలో నాసిరకం శానిటైజర్ తయారు చేస్తుండగా డ్రగ్ కంట్రోల్ అధికారులు ఓ వ్యక్తిని పట్టుకున్నారు. బొమ్మి మెడికల్ డిస్ట్రిబ్యూటర్ పేరుతో శ్రీనివాసులు అనే వ్యక్తి సంతపేట దగ్గర శానిటైజర్లు తయారు చేస్తున్నాడు. ఇతర ప్రాంతాల నుంచి ముడిసరుకు తెచ్చుకుని శానిటైజర్ తయారు చేస్తూ.... నకిలీ లేబుల్స్తో అమ్మకాలు సాగిస్తున్నాడు. తన వద్ద శానిటైజర్లు దొరుకుతాయంటూ సోషల్ మీడియాలో ప్రచారం చేయటంతో ఆ విషయం డ్రగ్ కంట్రోల్ ఏడీ వీరకుమార్, ఇన్స్పెక్టర్ మహేష్లకు తెలిసింది. ఈ క్రమంలో వినియోగదారుల్లా తమకు సరకు కావాలంటూ సోషల్ మీడియాలోనే సంప్రదించారు. అనంతరం దాడులు నిర్వహించారు.
అతని నుంచి దాదాపు 500 శానిటైజర్ బాటిళ్లు, ముడిసరకును అధికారులు స్వాధీనం చేసుకున్నారు. వీటి నాణ్యతను పరీక్షించేందుకు ల్యాబ్కు తరలించారు. శానిటైజర్ తయారు చేసేందుకు సంబంధించిన లైసెన్స్ అతని వద్ద లేదని, అవి నాసిరకంగా ఉన్నాయని డ్రగ్ కంట్రోల్ అధికారులు పేర్కొన్నారు. వివిధ పార్టీల ప్రజాప్రతినిధులు, నాయకులు పేర్లతో శానిటైజర్లు తయారుచేసేందుకు ప్రయత్నిస్తున్నట్లు తెలిపారు.
