అంధుడైనా.. కరోనా మృతురాలిని చూడటానికి వచ్చారు!

అతను అంధుడు.. పట్టువదలక కృషి చేసి ఉద్యోగం సంపాదించారు. అతడు విధులకు వెళ్లే దారిలో ఓ ఎనభై ఏళ్ల వృద్ధురాలు టీ దుకాణం నడుపుతోంది. అలా టీ కొట్టు వద్ద మెుదలైన వీరి ప్రయాణం... అవ్వా మనువడి బంధంగా మారింది. ఈ తరుణంలో ఆ వృద్ధురాలు కరోనా బరిన పడి ప్రాణాలు కోల్పోయింది. ఈ విషయం తెలుసుకున్న అతడు.. ఆసుపత్రికి వెళ్లి ఆమె మృతదేహాన్ని మనసుతో చూశారు.

కరోనా కల్లోలంలో కుటుంబాలు కుదేలవుతున్నాయి. మరెన్నో కుటుంబాల్లో బంధాలు.. అనుబంధాలు మసకబారుతున్నాయి. కరోనా బారిన పడి మృతి చెందిన వారికి అయినవారే అంత్యక్రియలు చేయటానికి వెనకాడుతున్నారు. ఇటువంటి తరుణంలో.. ఓ అంధుడు ఓ వృద్ధురాలి పట్ల పెంచుకున్న ప్రేమ అందరి హృదయాలను ఆర్ద్రతతో నింపే సంఘటన నెల్లూరు జిల్లా నాయుడుపేటలో జరిగింది.

పట్టణంలోని ముస్లిం వీధిలో ఉంటున్న కలీల్​ అంధుడు. కావలి పురపాలక సంఘంలో ఉద్యోగం చేస్తున్నాడు. ప్రతిరోజు నాయుడుపేట రైల్వే స్టేషన్ నుంచి రైలులో వెళ్లి విధులకు హాజరవుతుంటారు. రైల్వే స్టేషన్ ఎదురుగా ప్రధాన రోడ్డుకు ఆనుకొని ఓ 80 వృద్ధురాలు టీ దుకాణం నడిపేది. ప్రతిరోజూ కలీల్ వృద్ధురాలి వద్ద టీ తాగటం అలవాటుగా మారింది. మతాలు వేరైనా.. అవ్వా మనువడిగా అనుబంధం ఏర్పడింది. ఈ క్రమంలోనే ఆమె కరోనా బారిన పడి ప్రాణాలు కోల్పోయింది. ఈ విషయం తెలుసుకున్న కలీల్ ఆసుపత్రికి చేరుకుని.. ఆమె మృతదేహాన్ని దూరంగా మనసుతో చూశారు. ఒక బంధువుగా బాధితురాలి కుటుంబ సభ్యులతో మృతదేహానికి అంత్యక్రియలు చేసేందుకు వెళ్లారు. మానవత్వం మంటగలిసిపోతున్న ఈ రోజుల్లో కలీల్ ఎంతో మందికి ఆదర్శంగా నిలుస్తున్నారు.

ఇదీ చదవండి: మానవవత్వం చాటుకున్న డీఆర్​డీవో ఛైర్మన్