అంతర్జాతీయ స్థాయిలో సీఎం జగన్ గొప్పలు - రాష్ట్రంలో నిరుద్యోగులకు తప్పని తిప్పలు

CM Jagan No Preference to Skill AP : నైపుణ్యాభివృద్ధిపై సీఎం జగన్‌ చెప్పే మాటలు.. కోటలే కాదు ఖండాంతరాలు దాటిపోతాయి. ఎందుకంటే శిక్షణ అనేది అంతర్జాతీయ స్థాయిలో ఉండాలని.. ప్రమాణాలూ ఆ స్థాయిలోనే రూపొందించాలని.. సంబంధిత శాఖపై సమీక్ష జరిపిన ప్రతిసారీ చెబుతుంటారు. జగన్‌ అలా చెప్పుకుంటూ వెళ్తున్నారే కానీ.. ఆయన మాటల్లోని నైపుణ్యం.. క్షేత్రస్థాయిలో మాత్రం ఎక్కడా కనిపించడం లేదు. ఉద్యోగాల కోసం ఇతర రాష్ట్రాలకు వలస వెళ్లాల్సిన పరిస్థితి యువతకు తప్పడం లేదు.

AP Rank for Nationally in Unemployment Training : కళాశాలల్లో 120 కోర్సుల్లో బోధన, శిక్షణ ఇవ్వండి.. పరిశ్రమలు కళ్లకు అద్దుకొని తీసుకొనేలా యువతను సిద్ధం చేయాలి.. నైపుణ్య విశ్వవిద్యాలయాలు ఏర్పాటు చేయండి.. అంటూ నైపుణ్యాభివృద్ధిపై ఆదేశాలివ్వడంలో ముందుండే సీఎం జగన్‌.. వాటి అమలు తీరును మాత్రం పట్టించుకోవడం లేదు. జగన్‌ ఏలుబడికి నాలుగున్నరేళ్లు దాటిపోయింది. నైపుణ్య విశ్వవిద్యాలయాల మాట దేవుడెరుగు.. ఇంతవరకు కనీసం నైపుణ్య కళాశాలలకు భవనాలే నిర్మించలేకపోయారు.

AP Rank in Country for Employment : కేంద్ర ప్రభుత్వం దీన్‌దయాళ్‌ ఉపాధ్యాయ గ్రామీణ్‌ కౌశల్య యోజన కింద ఇస్తున్న నిధులను తీసుకుంటూ.. కేవలం మొక్కుబడి తంతుగా నైపుణ్య శిక్షణను నడిపిస్తున్నారు. గత ప్రభుత్వం ఏర్పాటు చేసిన శిక్షణ​ కేంద్రాలను నిర్ధాక్షిణ్యంగా మూసేసి.. నిరుద్యోగులను నైపుణ్యానికి దూరం చేశారు.ఇంజినీరింగ్‌ విద్యార్థుల కోసం ప్రత్యేకంగా విశాఖలో నైపుణ్య వర్శిటీ ఏర్పాటు చేస్తామని చెప్పిన సీఎం.. ఇంతవరకు దానికి స్థలాన్నే ఖరారు చేయలేకపోయారు. అలాగే తిరుపతి జిల్లా కోబాక సమీపంలో మరో నైపుణ్య వర్సిటీ ఏర్పాటు కోసం 50 ఎకరాలు సేకరించి వృథాగా వదిలేశారు.

వర్శిటీకి అనుబంధంగా 30 కళాశాలలు ఏర్పాటు చేస్తామని.. 1210కోట్ల రూపాయలతో నైపుణ్య కళాశాలలు నిర్మిస్తామంటూ ఊదరగొట్టారు. కానీ భవన నిర్మాణ ఆకృతులు రూపొందించినా లాభం లేకపోయింది. నిర్మాణాలకు టెండర్లు పిలిస్తే గుత్తేదార్ల నుంచి స్పందనే రాలేదు. దీంతో నిర్మాణాల సంగతి పక్కనపెట్టేసి.. కేంద్ర ప్రభుత్వ సంస్థలు, రాష్ట్ర విశ్వవిద్యాలయాల్లో కళాశాలలు ఏర్పాటు చేసి సరిపెట్టేశారు.

Deendayal Upadhyaya Gramin Kaushalya Yojana : నైపుణ్య శిక్షణకు అనేక సంస్థలతో ఒప్పందాలు చేసుకున్నా.. ఎలాంటి లాభం లేదు. కేంద్ర పథకం దీన్‌దయాళ్‌ ఉపాధ్యాయ గ్రామీణ్‌ కౌశల్య యోజన కింద అందించే కోర్సులనే రాష్ట్ర ప్రభుత్వం నిర్వహిస్తోంది. కేంద్రం కొన్ని సంస్థల ద్వారా ఈ పథకాన్ని అమలు చేస్తుండగా.. రాష్ట్ర ఉద్యోగ కల్పన, వ్యవస్థాపక అభివృద్ధి సంస్థను.. రాష్ట్ర ప్రభుత్వం తరపున చూపి.. నిధులు తీసుకుంటోంది. కానీ ఘనత మాత్రం తమదిగానే ప్రచారం చేసుకుంటోంది.

ఇప్పటివరకు వీటిల్లో శిక్షణ పొందిన వారు 1520 మంది మాత్రమే. వీరిలో వెయ్యి 87మందికి ఉద్యోగాలు లభించాయి. ఏటా కళాశాల నుంచి బయటకు వచ్చేవారు 2 లక్షల30వేలకుపైగా ఉంటే.. వీరిలో 40శాతం మందికే ఉద్యోగాలు వస్తున్నాయి. ఈ లెక్కన ఏటా లక్షా 38 వేల మందికి నైపుణ్య శిక్షణ అవసరం. కానీ ప్రభుత్వ నైపుణ్య కళాశాలల్లో ఏటా గరిష్ఠంగా 6500కి మించి శిక్షణ ఇవ్వలేకపోతున్నారు.

AP Position in Youth Employment : వైసీపీ ప్రభుత్వం వచ్చిన తర్వాత నైపుణ్యాలున్న యువతను అందించే రాష్ట్రాల్లో ఏపీ ర్యాంకు ఏటా పతనమవుతూనే ఉంది. ఉద్యోగార్హత నైపుణ్యాలున్న యువతను అందించే రాష్ట్రాల్లో ఏపీ 2016 నుంచి 2019 వరకు.. ఒక్క 2017 మినహా ఏటా దేశంలోనే మొదటి స్థానంలో నిలిచింది. 2017లోనూ రెండో స్థానంలో ఉంది. వైసీపీ ప్రభుత్వం వచ్చాక.. 2022లో జాతీయ స్థాయిలో ఏపీ ఏడో స్థానానికి పడిపోయింది.

నైపుణ్య శిక్షణనే అటకెక్కించిన జగన్‌ సర్కార్‌.. ఉద్యోగాలకు సిద్ధంగా ఉన్న యువతను అందించగలదనుకుంటే అత్యాశే అవుతుందన్న విమర్శలు వ్యక్తమవుతున్నాయి. గత ప్రభుత్వంలో నైపుణ్య శిక్షణకు వచ్చిన ఉత్తమ అవార్డులను తమ ఖాతాలో వేసుకొని ప్రచారం చేసుకోవడమే వైసీపీ సాధించిన అతి పెద్ద ఘనత.

నైపుణ్య కళాశాలల్లో శిక్షణ పొందిన వారికి ఉద్యోగాలు వచ్చినా.. జీతాలు తక్కువగా ఉండటంతో కొందరు చేరడం లేదు. మరికొందరు చేరినా కొన్నాళ్లకే మానేస్తున్నారు. దీంతో ఉపాధి అవకాశాల కోసం.. ఇతర రాష్ట్రాలకు, దూర ప్రాంతాలకు వలస వెళ్లాల్సి వస్తోంది.