కర్నూలు జిల్లాలో జడ్పీటీసీ, ఎంపీటీసీ ఎన్నికల ప్రక్రియ ప్రారంభమైంది. 53 జడ్పీటీసీ స్థానాలకు గాను... 16 ఏకగ్రీవం అయ్యాయి. కొలిమిగుండ్ల మండలంలో ఏకగ్రీవమైన జడ్పీటీసీ మృతిచెందగా... ఈ విషయాన్ని ఎలక్షన్ కమిషన్కు జిల్లా అధికారులు రిపోర్టు చేశారు. నంద్యాల మండలంలో పోటీలో ఉన్న జడ్పీటీసీ అభ్యర్థి మృతి చెందడంతో... అక్కడ ఎన్నికలు జరగవని అధికారులు తెలిపారు. మిగిలిన 36 స్థానాలకు 146 మంది బరిలో నిలిచారు. జిల్లాలో 807 ఎంపీటీసీ స్థానాలు ఉండగా అందులో 312 ఏకగ్రీవం అయ్యాయి. వీరిలో 9 మంది ఎంపీటీసీలు మృతి చెందారు.
ఆదోని మున్సిపాలిటీలో 3 ఎంపీటీసీ స్థానాలు విలీనం అయ్యాయి. మృతిచెందిన ఎంపీటీసీలు సహా విలీనమైనవి కలుపుకొని 12 చోట్ల ఎన్నికలు నిర్వహించటం లేదని... కలెక్టర్ వీరపాండియన్ తెలిపారు. మిగిలిన 483 ఎంపీటీసీ స్థానాలకు 1308 మంది అభ్యర్థులు బరిలో నిలిచారు. 15,41,272 మంది ఓటర్లు తమ ఓటు హక్కును వినియోగించుకోనున్నారు. 1763 పోలింగ్ స్టేషన్లు ఏర్పాటు చేసినట్లు... వీరపాండియన్ తెలిపారు.
తమిళనాడులో జరుగుతున్న ఎన్నికల బందోబస్తుకు 4 వందల మంది జిల్లా పోలీసులు వెళ్లగా... మిగిలిన 3 వేల మందితో ఎన్నికలు నిర్వహించనున్నారు. జిల్లావ్యాప్తంగా 484 ప్రాంతాల్లో 130 అతి సమస్యాత్మక, 110 సమస్యాత్మక, 244 సాధారణ ప్రాంతాలను గుర్తించారు. 5 అంతర్రాష్ట్ర, 10 అంతర్ జిల్లా చెక్ పోస్టులు ఏర్పాటు చేసి తనిఖీలు చేపడుతున్నారు.
డబ్బు, మద్యం పంపిణీ, తదితర అక్రమాలకు పాల్పడే వారిపై ప్రత్యేక నిఘా ఉంచామని జిల్లా ఎస్పీ ఫక్కీరప్ప తెలిపారు. ఎన్నికల కోడ్ అమలులోకి వచ్చినప్పటి నుంచి చెక్ పోస్టులు ఏర్పాటు చేసి, ఫ్లయిండ్ స్క్వాడ్స్తో ముమ్మరంగా తనిఖీలు చేస్తున్నామన్నారు. ప్రచారానికి సింగిల్ విండో సిస్టమ్ ద్వారా అనుమతులు తీసుకోవాలని స్పష్టం చేశారు. ఎన్నికల ఫలితాలు విడుదలైన తర్వాత విజయోత్సవ ర్యాలీలు, సభలు, ఊరేగింపులు, డప్పులు, బాణాసంచా కాల్చడం నిషేధించామని వివరించారు.
జడ్పీటీసీ, ఎంపీటీసీ ఎన్నికలకు సంబంధించి ఫిర్యాదుల స్వీకరణకు కమాండ్ కంట్రోల్ రూం ఏర్పాటు చేశారు. టోల్ ఫ్రీ నెంబర్ 18004255180, వాట్సాప్ నెంబర్ 8897870074, మెయిల్ ఐడి zppkurnool@gmail.com లకు ఫిర్యాదులు చేయవచ్చని అధికారులు స్పష్టం చేశారు.
ఇదీ చదవండీ... 40 ఏళ్ల తెలుగుదేశం రాజకీయ చరిత్రలో ఇదే తొలిసారి..!
