రోడ్డు ప్రమాదాలు పలువురి జీవితాలను చిన్నాభిన్నం చేస్తున్నాయి. ఈ కారణంగా నిత్యం ఎంతో మంది విగతజీవులవుతున్నారు. పలువురు శాశ్వతంగా వికలాంగులుగా మారుతున్నారు. ఏటేటా రోడ్డు ప్రమాదాలలో మరణాలు పెరుగుతుండడం ఆందోళనకు గురి చేస్తోంది. ఈ పరిస్థితుల్లో ఈ ఏడాది మొదటి మూడు నెలల గణాంకాలు పరిశీలిస్తే.. ప్రమాదాలలో కాస్త తగ్గుదల కనిపించింది. మృతులు, క్షతగాత్రుల సంఖ్య కూడా తగ్గింది. దీనికి అధికారుల చర్యలతో పాటు, ప్రధానంగా లాక్‌డౌన్‌ కూడా కలిసొచ్చింది. ఈ సంఖ్యను మరింత తగ్గించడంపై కృష్ణా జిల్లా యంత్రాంగం దృష్టి సారిస్తే ప్రయోజనం ఉంటుంది.
ఎక్కువ ద్విచక్ర వాహనాలతోనే..
ద్విచక్ర వాహనాల కారణంగా అధిక ప్రమాదాలు జరుగుతున్నాయి. ఆ తర్వాత భారీ వాహనాల వల్ల సంభవిస్తున్నాయి. మద్యం తాగి నడపడం, రవాణా వాహనాలకు వెనుక వైపు రిఫ్లెక్టర్లు లేకపోవడం, అధిక బరువుతో వెళ్లడం, తదితర కారణాలతోనూ ప్రమాదాలు ఎక్కువ అవుతున్నాయి. ప్రయాణికుల వాహనాల్లో పరిమితికి మించి ఎక్కించడం, సరకు తీసుకెళ్లే వాహనాల్లో జనాలను ఎక్కించడం, అతివేగంతో నడపడం కూడా ప్రమాదాలకు కారణం అవుతున్నాయి. జాతీయ రహదారులపైన కూడా వంద కి.మీ వేగం దాటితే ప్రాణాలకు హామీ లేని పరిస్థితి. మొత్తం ప్రమాదాల్లో దాదాపు 65 శాతం వరకు ఈ కారణంగానే సంభవిస్తున్నాయి. యువకులు ర్యాష్‌ డ్రైవింగ్, ప్రమాదకర విన్యాసాలు చేస్తున్నారు. ఈ కారణంగా ప్రమాదాలు చోటుచేసుకుంటున్నాయి.
లాక్‌డౌన్‌తో అదుపు
ఈ ఏడాది ప్రారంభం నుంచి రవాణా, పోలీసు అధికారులు రహదారుల వెంబడి తనిఖీలను పెంచారు. హెల్మెట్‌ లేకుండా నడిపే వారికి జరిమానాలు, డ్రంకన్‌ డ్రైవింగ్, సరైన పత్రాలు లేకుండా నడిపే వారిని గుర్తించి జరిమానాలు విధించడం, అధిక వేగంతో దూసుకెళ్లే వారికి చలానాలు విధించారు. ఈ చర్యలు కొంత వరకు ప్రమాదాల కట్టడికి దోహదం చేశాయి. మార్చి, 22 నుంచి లాక్‌డౌన్‌ అమలులోకి వచ్చింది. దీని వల్ల నిర్ణీత వేళలు మినహా మిగిలిన సమయాలలో కర్ఫ్యూ అమలు చేశారు. దీని వల్ల మొదటి త్రైమాసికంలోని మార్చి చివరి వారంలో రోడ్డు ప్రమాద ఘటనలు చాలా స్వల్పంగానే నమోదయ్యాయి. దీంతో గత ఏడాది ఇదే త్రైమాసికంతో పోలిస్తే తగ్గుదల కనిపించింది.
వీటిని పట్టించుకోండి..
రోడ్డు ప్రమాదాల సంఖ్యను వీలైనంత వరకు తగ్గించడంపై అధికారులు శ్రద్ధ చూపాలి. జాతీయ రహదారులపై ఆవాస ప్రాంతాల వద్ద వీధి దీపాలు లేని చోట్ల వెంటనే అమర్చాలి. ఈ సమస్యను నివారిస్తే ప్రమాదాలు ఇంకా తగ్గే అవకాశం ఉంది. రహదారులపై వేగనిరోధకాలు అవసరం లేని రద్దీ ప్రాంతాల్లో రంబుల్‌ స్ట్రిప్స్‌ వేస్తున్నారు. భారీ వాహనాలు రాకపోకలు పెరిగినందున త్వరగా పాడవుతున్నాయి. వెంటనే వేయకపోవడం వల్ల వేగాన్ని నియంత్రించడం కష్టమవుతోంది.
ఇదీ చదవండి: కరోనా నేర్పిన పాఠం... ఆహార భద్రతే సూత్రం
