గుట్కా అమ్మకాలపై పోలీసుల మెరుపుదాడులు.. వంద మందిపై కేసు

కృష్ణా జిల్లాలో నిషేధిత గుట్కా, నాటుసారా తయారీ, అక్రమ మద్యం రవాణాపై పోలీసులు రెండు రోజులుగా దాడులు నిర్వహిస్తున్నారు. దాదాపు వంద మందిపై కేసులు నమోదు చేశారు. ప్రజల ఆరోగ్యంతో చెలగాటమాడితే ఉపేక్షించేది లేదని పోలీసులు హెచ్చరించారు.

కృష్ణా జిల్లావ్యాప్తంగా గుట్కా నిల్వలు, నాటు సారా తయారీ, అక్రమ మద్యం రవాణాపై పోలీసులు మెరుపు దాడులు నిర్వహించారు. గత రెండు రోజులుగా ప్రత్యేక డ్రైవ్​లో మద్యం రవాణాకు సంబంధించి 44 కేసులు, గుట్కాపై 35, నాటు సారా తయారీపై 8 కేసులు నమోదు చేసినట్లు పోలీసులు తెలిపారు. అక్రమంగా గుట్కాలు నిల్వ ఉంచిన గోడౌన్​లపై ఏక కాలంలో మెరుపు దాడులు నిర్వహించారు. గుట్కా, నాటుసారా, అక్రమ మద్యం కేసులలో 100 మందిని అరెస్టు చేసినట్లు వివరించారు. కొందరి స్వప్రయోజనాల కోసం ప్రజల ఆరోగ్యంతో చెలగాటమాడే వారిని ఉపేక్షించేది లేదని.. వారిపై ఉక్కుపాదం మోపుతామని పోలీసులు హెచ్చరించారు.

తనిఖీలు చేస్తున్న ఎస్సై తరంగణి

జిల్లా వ్యాప్తంగా 5 సబ్ డివిజన్ల పరిధిలోని మారుమూల గ్రామాల్లో సోదాలు నిర్వహించి.. గుట్కా ప్యాకెట్లను స్వాధీనం చేసుకున్నారు. మొత్తం రూ.12 లక్షల విలువచేసే గుట్కా ప్యాకెట్లను స్వాధీనం చేసుకుని.. 38 మంది వ్యక్తులను అరెస్టు చేశామని పోలీసులు తెలిపారు. అక్రమ మద్యం కేసుల్లో 54 మంది వ్యక్తులను అరెస్టు చేసి.. 2239 లిక్కర్ బాటిల్స్ స్వాధీనం చేసుకున్నట్లు వివరించారు. 2 కార్లు, 9 ద్విచక్ర వాహనానలను సీజ్ చేశామన్నారు.

పాన్ షాప్​లపై పోలీసుల ఆకస్మిక తనిఖీలు..

గుంటూరు జిల్లా అరండల్​పేట, బ్రాడిపేట, కొరిటిపాడు సెంటర్లలోని పాన్ షాప్​లపై పోలీసులు ఆకస్మిక తనిఖీ చేశారు. పలు దుకాణాల్లో గుట్టుచప్పుడు కాకుండా విక్రయిస్తున్న నిషేధిత గుట్కాలకు పోలీసులు స్వాధీనం చేసుకున్నారు. అరండల్​పేటలో సుమారు రూ.3 వేల విలువైన నిషేధిత గుట్కా, పొగాకు ఉత్పత్తి నిల్వలను స్వాధీనం చేసుకున్నట్లు ఎస్సై తరంగణి తెలిపారు. ప్రభుత్వం నిషేధించిన గుట్కా, ఖైనీ ఎవరైనా విక్రయిస్తే చట్టపరమైన చర్యలు తప్పవని ఎస్సై హెచ్చరించారు. చుట్టూ ప్రక్కల ఎక్కడైనా గుట్కా, గంజాయి వంటి మాదక ద్రవ్యాల గురించిన సమాచారం ఉంటే వెంటనే పోలీసులకు తెలియచేయాలని ఆమె సూచించారు.

ఇదీ చదవండి: