Farmers Suffering Unseasonal Rains: రాష్ట్రంలో కురుస్తున్న అకాల వర్షాల కారణంగా అన్నదాతలు అతలాకుతలమవుతున్నారు. ఆరుగాలం శ్రమించి పంటను పండిస్తే.. చేతికి అందాల్సిన పంట కళ్లెదుటే నేలకొరగడంతో కన్నీరు మున్నీరవుతున్నారు. వర్షంతోపాటు గాలి బీభత్సం సృష్టించడంతో మిర్చి, మొక్కజొన్న, మినుము, అరటి తదితర పంటలు తీవ్రంగా దెబ్బతిన్నాయంటూ ఆవేదన చెందుతున్నారు. అప్పులు తెచ్చి పంటలు పండించిన తమను, తమ కుటుంబాలను ప్రభుత్వం ఆదుకోకపోతే.. ఆత్మహత్యలే శరణ్యమని రైతన్నలు వాపోతున్నారు. ఇప్పటికైనా అధికారులు, ప్రభుత్వం స్పందించి తమను ఈ నష్టం నుంచి బయటపడేయాలంటూ వేడుకుంటున్నారు.
పంటంతా నీటిపాలు-రైతన్న కష్టాలపాలు: అహర్నిశలు కష్టపడి కంటికి రెప్పలా కాపాడుకున్న పంట.. నీటిపాలు కావడంతో నిండా మునిగిపోయామని అన్నదాతలు బావురుమంటున్నారు. భారీ వర్షాలకు తడిచిన వరి, మిరప తదితర పంటను కాపాడుకునేందుకు నానా తంటాలు పడుతున్నారు. గతంలో మాదిరి ప్రభుత్వం పట్టాలను సైతం అందించకపోవడంతో పంటను ఎలా కాపాడుకోవాలో అర్థం కావడం లేదని ఆందోళన చెందుతున్నారు.
ఏలూరు జిల్లాలో వర్షాలు: అప్పులు తెచ్చి పెట్టుబడి పెట్టి.. ఆరుగాలం శ్రమించిన అన్నదాతల్ని ఆకాల వర్షాలు ముప్పతిప్పలు పెడుతున్నాయి. ఏలూరు జిల్లా ఏజెన్సీ ప్రాంతాల్లో రెండు రోజులుగా కురుస్తున్న వర్షాలు పొగాకు, నిమ్మ రైతుల ఆశలపై నీళ్లు చల్లాయి. చేతికొచ్చిన పంట దెబ్బతినడంతో.. ఏం చేయాలో తెలియడం లేదని వాపోతున్నారు. కష్టంతో పాటు పెట్టుబడి సైతం వర్షార్పణమైందని జంగారెడ్డిగూడెం డివిజన్ చిన్నంవారి గూడెం రైతులు కన్నీరు పెట్టుకుంటున్నారు.
రూ. 70వేల పెట్టుబడితో మొత్తం 5 ఎకరాల్లో చెరుకు పంటను పెట్టాను. రాత్రినక, పగలక కురిసిన వర్షం, గాలి వల్ల పంటంతా నేలకు వరిగింది. దాదాపు చెట్లన్నీ పాడైపోయాయి. ఏం చేయాలో అర్ధంకావటం లేదు. ప్రభుత్వం స్పందించి తమను ఆదుకోవాలని వేడుకుంటున్నాము. -సూరిబాబు, రైతు
కృష్టా జిల్లాలో పంటలు వర్షం పాలు: అకాల వర్షాలకు కృష్టా జిల్లా పెనమలూరు మండలంలో మొక్కజొన్న. జొన్న, అరటి పంటలు తీవ్రంగా దెబ్బతిన్నాయి. ఎన్టీఆర్ జిల్లా నందిగామ, కంచికచర్ల, పెనుగంచిప్రోలు, వీరులపాడు, వత్సవాయి మండలాల్లో కళ్లాల్లో ఆరబెట్టిన మిర్చి పూర్తిగా తడిచిపోయింది. వారం, పది రోజుల్లో చేతికొస్తుందన్న పంట వర్షం పాలు కావటంతో రైతులు ఆవేదన వ్యక్తం చేస్తున్నారు.
గుంటూరు జిల్లాలో మిరప నీటిపాలు: అహర్నిశలు కష్టపడి కాపాడుకున్న పంట నీటిపాలైందంటూ గుంటూరు జిల్లా మిరప రైతులు కన్నీరు పెడుతున్నారు. ప్రత్తిపాడు మండలం కోయవారిపాలెం అన్నదాతలు.. పొలాలు, కల్లాల్లోని తడిచిన పంట కాపాడుకునేందుకు పడరాని పాట్లు పడుతున్నారు. పల్నాడు జిల్లా రాజుపాలెం మండలం అంచులవారిపాలెంలో మామిడి తోట మెుత్తం దెబ్బతినడంతో రైతులు ఆవేదన వ్యక్తం చేస్తున్నారు. ప్రభుత్వమే ఆదుకోవాలంటూ వేడుకుంటున్నారు.
అనంతపురంలో వడగళ్ల వాన: వడగళ్ల వర్షం తీవ్ర నష్టాన్ని మిగిల్చిందని.. అనంతపురం జిల్లా నార్పల మండలం వెంకటాంపల్లె రైతులు వాపోతున్నారు. అప్పులు తెచ్చి పెట్టుబడులు పెట్టి.. నిండా మునిగిపోయామని ఆవేదన వ్యక్తం చేశారు. ప్రభుత్వం న్యాయం చేయాలంటూ అన్నదాతలు వేడుకుంటున్నారు.
నెల్లూరులో ఈదురు గాలులు: అకాల వర్షాలతో నిండా మునిగిపోయామని.. నెల్లూరు జిల్లా కొడవలూరు మండలం గుండాలమ్మపాలెం రైతులు వాపోతున్నారు. కోత సమయంలో ఈదురు గాలులతో కూడిన భారీ వర్షాలు కోలుకోలేని దెబ్బ తీశాయని, ప్రభుత్వమే తమను ఆదుకోవాలని వేడుకుంటున్నారు. చేతికి వచ్చిన వరి పంట మెుత్తం నీటి పాలైందని అల్లూరు మండలం గోగులపల్లి వాసులు వాపోతున్నారు.
ఇవీ చదవండి
