Videshi Vidya Deevena : విదేశీ విద్యా దీవెన పథకం కింద లబ్దిపొందిన విద్యార్థులు అభివృద్దిలోకి వచ్చి ప్రపంచ వేదికపై దేశం, రాష్ట్ర జెండా ఎగురవేయాలని ముఖ్యమంత్రి వైఎస్ జగన్ సూచించారు. పేద పిల్లలు ఉన్నత చదువులు చదివేందుకు పేదరికం అడ్డు రాకూడదనే ఉద్దేశంతోనే విదేశీ విద్యా పథకాన్ని అమలు చేస్తున్నట్లు తెలిపారు. విదేశాల్లో పేరు, ప్రఖ్యాతులు పొందిన యూనివర్సిటీల్లో చదువుతోన్న విద్యార్థులకు సాయం అందిస్తున్నట్లు తెలిపారు.
213 మంది విద్యార్ధులు.. రూ.19.95 కోట్లు : జగనన్న విదేశీ విద్యా దీవెన పథకం కింద మొదటి విడత సాయం నిధులు విడుదల చేశారు. ఈ ఏడాది టాప్‌ 200 విదేశీ యూనివర్శిటీల్లో అడ్మిషన్లు పొందిన 213 మంది విద్యార్ధులకు రూ.19.95 కోట్లను విడుదల చేశారు. తాడేపల్లిలోని సీఎం క్యాంప్‌ కార్యాలయంలో బటన్‌ నొక్కి లబ్ధిదారుల ఖాతాలకు నిధులను జమ చేశారు. పిల్లలకు మనం ఇచ్చే ఆస్తి చదువేనని సీఎం అన్నారు. పరిస్ధితులను మార్చాలనే చిత్తశుద్దితో చర్యలు తీసుకుంటున్నామన్నారు. మన రాష్ట్రంలో విద్యా సంస్థలు అభివృద్ది చేస్తూ విద్య ప్రమాణాలను పెంచుతున్నామన్నారు.
రూ.8లక్షల లోపు ఆదాయం : రాష్టంలో అన్నిటికన్నా ఎక్కువ పెట్టుబడి విద్యపైనే పెడుతున్నామన్న సీఎం.. హ్యూమన్ రీసోర్సులో పెట్టుబడి పెట్టడం వల్ల పిల్లల తలరాతలు మారతాయన్నారు. రాష్ట్రంలో ప్రతి ఒక్కరి తలరాత మార్చే పరిస్ధితి వస్తుందన్నారు. పారదర్శకంగా జగనన్న విద్యా దీవెన పథకం అమలు చేస్తున్నట్లు తెలిపారు. రూ.8 లక్షలలోపు ఆదాయం ఉన్న వారందరికీ విదేశీ విద్యాదీవెన అమలు చేస్తున్నట్లు తెలిపారు. విదేశీ విద్యాదీవెనను 4 వాయిదాల్లో విద్యార్థుల ఫీజులు చెల్లిస్తున్నామని, 4వ సెమిష్టర్ పూర్తి చేయగానే చివరి ఇన్స్టాల్మెంట్ చెల్లిస్తామన్నారు. ఎవరికైనా ఎలాంటి ఇబ్బంది ఉన్నా సీఎంవోలో అధికారులు అందుబాటులో ఉంటారని, ఏ సమస్య ఉన్నా ఒక్క ఫోన్ కాల్ చేస్తే చాలు తోడుగా ఉండి అన్ని రకాల సాయం చేస్తారని జగన్ స్పష్టం చేశారు.
ఇవీ చదవండి :
