Soft Tennis Player Surya Akash Wins Silver Medal: సూర్య ఆకాశ్ సాఫ్ట్‌ టెన్నిస్‌లో పతకాల పంట.. ఎందరో యువకులకు స్ఫూర్తి

Soft Tennis Player Surya Akash Wins Silver Medal: మనలో చాలా మందికి క్రికెట్‌ అనగానే సచిన్‌, టెన్నిస్‌ అంటే సానియామీర్జా టక్కున మదిలో మెదులుతారు. అంతలా వాళ్లు ఆయా ఆటల్లో తమదైన ముద్రని వేసుకున్నారు. వారి స్ఫూర్తితో తనకంటూ ఓ గుర్తింపుని సొంతం చేసుకోవాలనుకున్నాడు ఆ యువకుడు. ఇలాంటి ఆలోచనతోనే టెన్నిస్ క్రీడాకారుడైన అతను సాఫ్ట్‌ టెన్నిస్‌ వైపు అడుగులు వేశాడు. జాతీయ స్థాయిలో ఉత్తమ ఆటగాడిగా నిలవడమేగాక ఇటీవల థాయ్‌లాండ్‌లో జరిగిన వరల్డ్ టూర్ టోర్నమెంట్‌లో దేశానికి వెండిపతకం అందించాడు. అంతర్జాతీయ క్రీడావేదికలపై భారత్‌కు మరిన్నిపతకాలు అందించటమే లక్ష్యంగా సాగుతున్నాడు ఈ గుంటూరు యువకుడు.

Soft Tennis Player Surya Akash Wins Silver Medal : చదువుకిచ్చే ప్రాధాన్యతతో పోలిస్తే మన దగ్గర క్రీడలకు ప్రోత్సాహం తక్కువే. పిల్లల ప్రతిభ చూసి కన్నవారు అండగా నిలిచినా ప్రభుత్వాల నుంచి లభించే సహకారం నామమాత్రమే. అందులో క్రికెట్, టెన్నిస్, షూటింగ్ లాంటి ఆదరణ ఉన్న ఆటలు కాకుండా విభిన్న క్రీడల్ని ఎంచుకుంటే.. పట్టించుకునేవారే ఉండరు. ఇలాంటి ప్రతికూల పరిస్థితుల్లోనూ తన ప్రతిభను నమ్ముకుని సాఫ్ట్ టెన్నిస్​లో సంచలనాలు నమోదు చేస్తున్నాడు.గుంటూరుకు చెందిన పోకల సూర్య ఆకాశ్. అథ్లెట్​గా క్రీడా జీవితాన్ని ప్రారంభించిటెన్నిస్ ఆటలో రాణిస్తూ.. ఇప్పుడు సాఫ్ట్ టెన్నిస్​లో పతకాల పంట పండిస్తున్నాడు. ఇటీవల థాయ్ లాండ్​లో జరిగిన వరల్డ్ టూర్ ఛాంపియన్ షిప్ పోటీల్లో డబుల్స్ విభాగంలో వెండి పతకాన్ని కైవసం చేసుకున్నాడు .

Soft Tennis Player Surya Akash Wins Silver Medal : గుంటూరు ద్వారకనగర్​కు చెందిన సూర్య ఆకాశ్ కేఎల్ విశ్వవిద్యాలయంలో ఇంజినీరింగ్ మూడో ఏడాది చదువుతున్నాడు. అటు క్రీడల్లోనూ, ఇటు చదువులోనూ రాణిస్తున్నాడు. పాఠశాల దశ నుంచే క్రీడల్లో ప్రతిభ చూపిన ఆకాశ్​ను తల్లిదండ్రులు సుబ్బారావు, గాయత్రి ప్రోత్సహించారు. ఆకాశ్​లోని నైపుణ్యాల్ని గమనించిన కోచ్ శివప్రసాద్ టెన్నిస్ క్రీడలో శిక్షణ ఇచ్చారు. టెన్నిస్ క్రీడాకారుడిగా పలు జిల్లా, రాష్ట్ర, జాతీయ స్థాయి పోటీల్లో పతకాలు సాధించిన ఆకాశ్ నాలుగేళ్ల కిందట సాఫ్ట్ టెన్నిస్ పై ఆసక్తి పెంచుకున్నాడు. తల్లిదండ్రులు, కోచ్‌ల సహకారంతో స్వల్ప సమయంలోనే ఈ ఆటలో ప్రావీణ్యం సంపాదించాడు.

Soft Tennis Player Surya Akash Succuful Story: మన దేశంలో చాలా మందికి పరిచయం లేని సాఫ్ట్‌ టెన్నిస్‌ గురించి అందరికీ తెలిసేలా చేయాలనుకున్నాడు ఆకాశ్‌. ఎలాగైనా సరే ఈ క్రీడలో మేటి అనిపించుకోవాలని తనకంటూ ఓ ప్రత్యేకను సృష్టించుకోవాలని పరితపించాడు. ప్రతిరోజు క్రమం తప్పకుండా ఎన్టీఆర్ స్టేడియంకు వెళ్లి సాధన చేసేవాడు. ఏ పోటీలో పాల్గొన్నా పతకం సాధించాలనే పట్టుదలతో ఆడేవాడు. అతని దీక్షా, సంకల్పానికి ప్రతీకగా ఆనతికాలంలోనే రాష్ట్ర, జాతీయ స్థాయి పోటీల్లో పతకాలతో మెరిశాడు.

2019 హరియాణాలో జరిగిన ఆలిండియా టెన్నిస్ పోటీల్లో ఆకాశ్‌ ప్రథమ స్థానంలో నిలిచాడు. అదే ఏడాది సెప్టెంబర్​లో పంజాబ్​లో జరిగిన ఆలిండియా నేషనల్ ర్యాంకింగ్ టోర్నీలోనూ విశేష ప్రతిభ కనబరిచాడు. 2021, 2022లో హైదరాబాద్ వేదికగా జరిగిన రాష్ట్ర స్థాయి సాఫ్ట్ టెన్నిస్ పోటీల్లో రజత పతకాలు సొంతం చేసుకున్నాడు. ఈ ఏడాది మార్చిలో హరియాణాలో జరిగిన జాతీయ స్థాయి పోటీల్లో బంగారు పతకం సాధించాడు. జాతీయ స్థాయిలో అత్యుత్తమ ఆటతో మెరవడంతో అంతర్జాతీయ క్రీడా వేదికలపై దేశానికి ప్రాతినిధ్యం వహించే అవకాశం లభించింది.

1994లోనే ఆసియా క్రీడల్లో సాఫ్ట్‌ టెన్నిస్‌కు స్థానం కల్పించారు. జపాన్, తైవాన్, థాయిలాండ్, ఫిలిప్పీన్స్‌ వంటి అనేక దేశాల్లో ఈ ఆటకు మంచి ఆదరణ ఉంది. మన దేశంలో ఎప్పటి నుంచో ఈ క్రీడ ఆడుతున్నా ఎక్కువ గుర్తింపు లభించలేదు. ఉత్తర భారతదేశంతో పోలిస్తే దక్షిణాది రాష్ట్రాల్లో సాఫ్ట్ టెన్నిస్ ఆడే క్రీడాకారులు చాలా తక్కువ. ఈ లోటును భర్తీ చేస్తూ అందరూ గర్వపడేలా ఈ ఆటలో అద్భుత విజయాలు నమోదు చేస్తూ సత్తా చాటుతున్నాడు ఆకాశ్.

షూటింగ్‌లో రాణిస్తున్న తమ పెద్ద కుమారుడు ఉన్నత చదువుల కోసం ఆటని పక్కన పెట్టినప్పుడు ఎంతో నిరాశ చెందామని ఆకాశ్ తల్లిదండ్రులు తెలిపారు. అయితే ఆకాశ్ సాఫ్ట్‌టెన్నిస్​లో అంతర్జాతీయ స్థాయికి ఎదగడం సంతోషంగా ఉందని వారు ఆనందం వ్యక్తం చేస్తున్నారు. ప్రభుత్వం నుంచి మరింత సహకారం లభిస్తే దేశానికి మరిన్ని పతకాలు అందిస్తాడని అంటున్నారు.

చదువు, ఆట రెండింటినీ సమన్వయపరచుకుంటూనే జాతీయ స్థాయిలో ఉత్తమ సాఫ్ట్ టెన్నిస్ క్రీడాకారుడిగా మన్ననలందుకుంటున్నాడు సూర్య ఆకాశ్‌. తదుపరి లక్ష్యం ఆసియా, ఒలింపిక్‌ టోర్నీల్లో పతకం సాధించడమేనని చెబుతున్నాడు. ప్రభుత్వం చేయూత కూడా తోడైతే అంతర్జాతీయ స్థాయిలో మరిన్ని పతకాలు కొల్లగొట్టగలనని ధీమా వ్యక్తం చేస్తున్నాడు.