వైకాపా అధ్యక్షుడు వైయస్ జగన్మోహన్రెడ్డి ప్రమాణ స్వీకార వేదిక ఖరారైంది. విజయవాడలోని మున్సిపల్ స్టేడియంలో ఈనెల 30న మధ్యాహ్నం 12.23 గంటలకు ముఖ్యమంత్రిగా ప్రమాణ స్వీకారం చేయనున్నారు. సీఎస్ అధ్యక్షతన జరిగిన ఉన్నతస్థాయి సమావేశంలో ప్రమాణ స్వీకార ఏర్పాట్లపై చర్చించారు. గవర్నర్ సహా ముఖ్యులు హాజరవుతున్నందున తగిన ఏర్పాట్లు చేయాలని సీఎస్ సుబ్రహ్మణ్యం అధికారులను ఆదేశించారు. ట్రాఫిక్ ఇబ్బందులు లేకుండా చూడాలని పోలీసు ఉన్నతాధికారులకు సూచించారు.
కార్యక్రమానికి వచ్చేవారికి 5 కేటగిరీలుగా పాస్‌లు జారీ చేయాలని నిర్ణయించారు. స్టేడియంలోకి 25 వేల మందికి మాత్రమే అనుమతి ఇవ్వాలని అధికారులు నిర్ణయించారు. ఎండల దృష్ట్యా స్టేడియంలో ఏసీలు, కూలర్లు, తాగునీటి సౌకర్యం కల్పించనున్నారు. స్టేడియం వెలుపల ఎల్‌సీడీ తెరలు ఏర్పాటు చేయాలని యోచిస్తున్నారు.
ఇందిరాగాంధీ స్టేడియంలో జగన్ ప్రమాణ స్వీకార ఏర్పాట్లను కృష్ణా కలెక్టర్, విజయవాడ సీపీ, మున్సిపల్ కమిషనర్ పరిశీలించారు. ప్రమాణ స్వీకారానికి దూరప్రాంతాల నుంచి వచ్చే వాహనాలు నిలిపివేయాలని నిర్ణయించారు. హైదరాబాద్, విశాఖ, చెన్నై నుంచి వచ్చే వాహనాలు శివార్లలో నిలిపివేయనున్నారు. పార్కింగ్ కోసం 5 రకాల ఎంట్రీ పాస్‌లు జారీ చేయాలని సీఎస్ ఆదేశించారు. పార్కింగ్‌కు ఏఆర్ గ్రౌండ్స్, బిషప్ అజరయ్య స్కూల్, పీడబ్ల్యూడీ గ్రౌండ్ను ఎంపిక చేశారు.
ఇవీ చదవండి..
